նախընտրելի դարձնել
Լատվիայի կառավարությունը մտադիր է մինչև 2027 թվականի հունվարի 10-ը երկրի ամբողջ տարածքում գյուղատնտեսության ոլորտում արտակարգ իրավիճակ հայտարարել՝ 2026 թվականին տեղի ունեցած երկարատև հորդառատ անձրևների և ջրածածկումների հետևանքները մեղմելու նպատակով, հայտնում է Delfi-ն։
Ըստ Գյուղատնտեսության նախարարության պատրաստած կարգադրության՝ գերատեսչությունը կկոորդինացնի գործողություններն արտակարգ իրավիճակի ընթացքում և տեղեկություններ կհավաքի տուժած գյուղատնտեսական հողերի, տնտեսությունների և պատճառված վնասի չափի մասին։
Իշխանությունները հույս ունեն նման կերպ մեղմել երկարատև և ինտենսիվ տեղումների հետևանքները, որոնք հանգեցրել են հողի գերխոնավացման։ Անբարենպաստ եղանակային պայմանների պատճառով որոշ տնտեսություններ չեն կարողանում լիարժեք ավարտել բերքահավաքը և կատարել այլ սեզոնային աշխատանքներ։
Առավել լուրջ հետևանքներ ավելի վաղ արձանագրվել էին Լատվիայի արևմտյան հատվածում, սակայն ամռան վերջում և աշնան սկզբին առատ տեղումներ գրանցվել են երկրի տարածքի մեծ մասում։ Կրկնակի անձրևները տեղացել են արդեն իսկ գերխոնավացած հողի վրա՝ ավելի սրելով իրավիճակը։
Լատվիայի շրջակա միջավայրի, երկրաբանության և օդերևութաբանության կենտրոնի տվյալներով՝ 2026 թվականի ամռանը երկրում տեղացել է 288,1 մմ տեղումներ՝ կլիմայական նորմայից 29%-ով ավելի։ 2025 թվականի ամառը նույնպես նորմայից զգալիորեն ավելի խոնավ էր․ այդ ժամանակ տեղացել էր 272,6 մմ տեղումներ, կամ նորմայից 22%-ով ավելի։ 2026 թվականի ամառը դարձել է դիտարկումների ամբողջ պատմության ընթացքում Լատվիայում 13-րդ ամենաանձրևոտը։
Գյուղական աջակցության ծառայության տվյալներով՝ անբարենպաստ եղանակից տուժած տարածքների մասին հայտնել է 174 ֆերմեր։ Նրանք հայտարարել են 10 հազար 335 հեկտարի վրա հասցված վնասի մասին, ինչը կազմում է երկրի գյուղատնտեսական տարածքների մոտ 0,4%-ը։ Միևնույն ժամանակ, իշխանությունները նշում են, որ այս տվյալները դեռևս ամբողջությամբ չեն արտացոլում հետևանքների մասշտաբը, և իրական վնասը կարող է զգալիորեն ավելի մեծ լինել։
Երկարատև հորդառատ անձրևների և ջրհեղեղների պատճառով Լատվիայի ամբողջ տարածքում գյուղատնտեսության ոլորտում արտակարգ իրավիճակ հայտարարվել էր նաև 2025 թվականին։ Անբարենպաստ եղանակային պայմանների կրկնությունը մեծացնում է այն տնտեսությունների ֆինանսական բեռը, որոնք դեռ չեն հասցրել փոխհատուցել նախորդ տարվա կորուստները։
Լրացուցիչ գործոն են մնում գյուղատնտեսական արտադրության համար անհրաժեշտ ռեսուրսների բարձր գները։
