Մեծ Բրիտանիայի բնակիչների գրեթե կեսը կողմ է Եվրոպական միությանը երկրի վերանդամակցությանը, ցույց է տվել «Messina Group» (TMG) ընկերության անցկացրած նոր հարցումը: Հետազոտությունը հրապարակվել է վարչապետ Էնդի Բերնհեմի այն հայտարարության ֆոնին, թե կառավարությունը դիտարկելու է ԵՄ-ի հետ ապագա հարաբերությունների բոլոր տարբերակները, ներառյալ՝ կառույցին լիարժեք վերանդամակցումը, գրում է «The Guardian»-ը:

Հարցման համաձայն՝ հարցվածների 49%-ը կողմ է արտահայտվել Մեծ Բրիտանիայի՝ ԵՄ վերադառնալուն, մինչդեռ 28,5%-ը դեմ է եղել: Հետազոտությունն անցկացվել է սեպտեմբերի 12-ից 24-ը (11461 մարդու շրջանում):

Եվս 48,2%-ը կողմ է արտահայտվել ԵՄ-ի հետ ընթացիկ հարաբերությունների պահպանմանը՝ առևտրային բարյերների առավելագույնս կրճատմամբ, իսկ 47,1%-ը՝ Մաքսային միություն վերադառնալուն: Միասնական շուկային միանալուն կողմ է եղել 45,1%-ը, իսկ ԵՄ ասոցացված անդամակցությանը՝ 45,5%-ը:

Միևնույն ժամանակ, 27,9%-ը կողմ է եղել ԵՄ-ից հետագա հեռացմանը, իսկ 41,2%-ը դեմ է արտահայտվել այդ տարբերակին:

Բերնհեմը Լեյբորիստական կուսակցության համաժողովում հայտարարել է, որ Մեծ Բրիտանիան պետք է վերանայի ԵՄ-ի հետ երկարաժամկետ հարաբերությունները: Ավելի ուշ նա պարզաբանել է, որ դիտարկվող տարբերակների թվում կարող է լինել նաև լիարժեք վերանդամակցումը: Այդուհանդերձ, Բրիտանիայի վարչապետը չի առաջարկել անհապաղ նոր հանրաքվե անցկացնել:

Հարցումը ցույց է տվել նաև, որ բրիտանացիների վերաբերմունքը «Brexit»-ի նկատմամբ փոխվել է. հարցվածների 52,4%-ը ԵՄ-ից դուրս գալու որոշումը սխալ է համարում, իսկ 29,7%-ը՝ ճիշտ: 54,9%-ը «Brexit»-ն անվանել է անհաջող, մինչդեռ 12,2%-ը այն հաջողված է համարել:

TMG-ն առանձին վերլուծել է նաև, թե ԵՄ-ի հետ մերձեցման տարբեր սցենարներն ինչպես կարող են ազդել Լեյբորիստական կուսակցության վարկանիշի վրա: Հետազոտողների մոդելավորման համաձայն՝ ԵՄ-ի հետ ավելի սերտ հարաբերություններ ենթադրող սցենարների դեպքում Լեյբորիստների օգտին տրված ձայների մասնաբաժինը կարող է ավելանալ 4,3–7,4 տոկոսային կետով: Սա էլեկտորալ մոդելավորման արդյունք է և ոչ թե ապագա ընտրությունների կանխատեսում:

Այդուհանդերձ, կառավարության ներսում պահպանվում են մտահոգությունները, որ «Brexit»-ի թեմայի վերաբացումը կարող է կրկին սրել քաղաքական տարաձայնությունները: Որոշ նախարարներ, ովքեր ներկայացնում են ԵՄ-ից դուրս գալու օգտին քվեարկած ընտրատարածքները, Բերնհեմին կոչ են անում զգույշ գործել: