Renault-ը Փարիզի ավտոսրահի համար պատրաստում է E-Space կոնցեպտը՝ Espace լեգենդար ընտանեկան ավտոմեքենայի էլեկտրական վերաիմաստավորումը, որը 1984 թվականին օգնեց մինիվենները դարձնել զանգվածային, հաղորդում է Autocar-ը։

Ընկերությունը նոր մոդելը անվանում է «վերագործարկում» և օրիգինալ Espace-ի ժամանակակից մեկնաբանություն։

Ներկայիս Espace-ն արդեն արտադրվում է վեցերորդ սերնդով, սակայն ժամանակի ընթացքում այն գործնականում վերածվել է մեծ քրոսովերի։ Նոր կոնցեպտուալ մոդելը, ընդհակառակը, վերադառնում է առաջին Espace-ի առանցքային գաղափարին՝ առավելագույնս ընդարձակ ընտանեկան ավտոմեքենային։

E-Space Concept-ի երկարությունը 4,7 մետր է։ Հրապարակված պատկերներից դատելով՝ ավտոմեքենան պահպանում է իր նախորդի ճանաչելի գծերը՝ խիստ թեքված առջևի հատվածը և գրեթե ուղղահայաց հետևի մասը, ինչը թույլ է տալիս ավելի արդյունավետ օգտագործել սրահի տարածքը։ Renault-ը խոստանում է «ընդարձակ, բարձր տեխնոլոգիական և հյուրընկալ» ինտերիեր, սակայն դրա լուսանկարները դեռ չեն հրապարակվել։

Ընկերությունը շեշտում է, որ E-Space-ը առայժմ մնում է բացառապես կոնցեպտ։ Միևնույն ժամանակ Renault-ը հայտարարում է, որ ավտոմեքենան պետք է ուսումնասիրի «ապագայի հնարավոր տարբերակները» և կարող է դառնալ Futuready նոր ռազմավարության մի մասը։ Սա սերիական տարբերակի հայտնվելու հնարավորություն է թողնում։

Մինիվենների նկատմամբ հետաքրքրության վերածնունդը տեղի է ունենում ավտոարտադրողների՝ էլեկտրական ուժային համակարգերի անցման ֆոնին։ Էլեկտրամոբիլների հարթակները, որոնց մարտկոցը տեղադրված է թափքի հիմքում, հնարավորություն են տալիս ստեղծել ընդարձակ սրահներ՝ համեմատաբար կոմպակտ արտաքին չափերի պայմաններում, ինչը հատկապես հարմար է ընտանեկան ավտոմեքենաների համար։ Եթե E-Space-ը հասնի կոնվեյերի, նրա ամենաակնհայտ մրցակիցներից մեկը կլինի Volkswagen ID. Buzz էլեկտրական մինիվենը։

E-Space Concept-ը կդառնա Renault-ի տաղավարի գլխավոր ցուցանմուշը հայրենի Փարիզի ավտոսրահում։ Ընկերությունը միաժամանակ կցուցադրի էլեկտրական քաղաքային Renault Twingo-ի նոր տարբերակը՝ 0,7 քառակուսի մետր մակերեսով համայնապատկերային ապակե տանիքով։ Renault-ի տվյալներով՝ տանիքի հատուկ ծածկույթը զտում է ուլտրամանուշակագույն ճառագայթների 99,9%-ը։

Բացի դրանից, Renault-ը կներկայացնի նոր լիթիում-երկաթ-ֆոսֆատային մարտկոցներ, որոնք նախատեսվում է օգտագործել բրենդի էլեկտրամոբիլներում, ինչպես նաև վերջերս ցուցադրված էլեկտրական Renault 8 Gordini կոնցեպտը։