Սաուդյան Արաբիայի մայրաքաղաք Էր-Ռիադում գտնվող Kingdom Centre երկնաքերի վարչակազմը գրասենյակների աշխատակիցներին պարտավորեցրել է անորոշ ժամկետով անցնել հեռավար աշխատանքի՝ Եմենի հութիների հաճախացած հարձակումների պատճառով, հայտնում է AFP-ն։

Որոշումն ընդունվել է Էր-Ռիադի միջազգային օդանավակայանի վրա խոշոր հարձակումից մեկ շաբաթ անց, որի հետևանքով զոհվել էր 13 մարդ։

«Հեռավար աշխատանքը պարտադիր է Kingdom Centre-ի բոլոր գրասենյակային աշխատակիցների համար՝ այս պահից մինչև հետագա ծանուցում», — ասվում է շենքի վարչակազմի նամակում, որին ծանոթացել է AFP գործակալությունը։ Այս ընթացքում գրասենյակներ այցելել չի կարելի, սակայն երկնաքերի ներքևում գտնվող առևտրի կենտրոնը շարունակում է գործել։

99 հարկ ունեցող Kingdom Centre-ում տեղակայված են խոշոր ընկերությունների և կազմակերպությունների գրասենյակներ, այդ թվում՝ Merrill Lynch-ը, McKinsey-ն և Արժույթի միջազգային հիմնադրամը։ Ավելի վաղ Էր-Ռիադի դպրոցները նույնպես երկարաձգել էին հեռավար ուսուցումը, իսկ մայրաքաղաքի օդանավակայանը նախորդ հարձակումից հետո շարունակում է փակ մնալ։

Իրավիճակի սրացման ֆոնին Սաուդյան Արաբիայի գլխավորած կոալիցիան հայտնել է Եմենի հետ սահմանին գտնվող Նաջրան նահանգում ռազմական ուղղաթիռի կործանման հետևանքով երկու օդաչուների մահվան մասին։ Կոալիցիայի վարկածով, պատճառը տեխնիկական անսարքությունն էր։ Իրենց հերթին հութիները հայտարարել են, որ նույն շրջանում խոցել են Apache ուղղաթիռ։

Կոալիցիան նաև հայտնել է երեք անօդաչու թռչող սարքի՝ երկուսը Էր-Ռիադի շրջանում և մեկը նավթով հարուստ Արևելյան նահանգի վրա, ինչպես նաև երկրի հարավում երկու բալիստիկ հրթիռի խոցման մասին։

Սաուդյան Արաբիայի և Իրանի աջակցությունը վայելող հութիների դիմակայությունը կրկին սրվել է ԱՄՆ-ի և Իրանի պատերազմի ֆոնին։ Հութիները հարվածել են սաուդական օբյեկտներին, ներառյալ նավթային ենթակառուցվածքներն ու Էր-Ռիադի օդանավակայանը, իսկ կոալիցիան հարվածներ է հասցնում խմբավորման վերահսկողության տակ գտնվող Եմենի տարածքներին։

Կիրակի Եգիպտոսի խորհրդարանը պետք է անցկացնի արտահերթ նիստ այն բանից հետո, երբ նախագահ Աբդել Ֆաթթահ աս-Սիսին պատգամավորներին խնդրել է թույլատրել Սաուդյան Արաբիային աջակցելու միջոցառումներ՝ հութիների հարձակումներից պաշտպանվելու համար։ Աս-Սիսին հայտարարել է, որ պատրաստ է սաուդական ղեկավարության խնդրանքով ձեռնարկել անհրաժեշտ պաշտպանական միջոցներ՝ ընդգծելով, որ խոսքը որևէ կողմի վրա հարձակման մասին չէ։