նախընտրելի դարձնել
Մեծ Բրիտանիայի և Լեհաստանի կառավարությունները քննադատել են ԱՄՆ պաշտպանության նախարար Փիթ Հեգսեթին այն բանից հետո, երբ, նրանց կարծիքով, նա թերագնահատել է ՆԱՏՕ-ի մյուս երկրների ներդրումը Աֆղանստանի պատերազմում։
Մեծ Բրիտանիայի վարչապետի գրասենյակի ներկայացուցիչը Դաունինգ Սթրիթ 10-ից միացել է Լեհաստանի արտգործնախարար Ռադոսլավ Սիկորսկուն, որոնք հանդես են եկել Հեգսեթի հայտարարությունների դեմ, գրում է Politico-ն։
Անցած շաբաթավերջին ելույթ ունենալով Թենեսիի համալսարանի լսարանի առջև՝ Պենտագոնի ղեկավարը հայտարարել է, որ ՆԱՏՕ-ի դաշնակիցներից միայն քչերն են «իրապես մասնակցել մարտական գործողություններին»։
«Երբ ես Աֆղանստանում ծառայում էի որպես կապիտան, մենք գնում էինք Քաբուլում գտնվող շտաբ, որտեղ 50 դրոշ կար։ Դա հիանալի տեսարան էր․ 50 տարբեր երկրներ իրենց ներդրումն էին բերում ՆԱՏՕ-ի դաշինքի գործունեությանը և Անվտանգությանն աջակցության միջազգային ուժերի (ISAF) առաքելությանը»,- հիշել է Հեգսեթը։
«Իրականում ներդրում ունեցել են, հնարավոր է, հինգ երկիր։ Իսկ առաքելության ավարտին մարտական գործողություններին, ըստ էության, մասնակցում էին միայն մեկ կամ երկու երկրներ։ Մենք նույնիսկ կատակով ասում էինք, որ ISAF հապավումը նշանակում է «I Saw Americans Fighting» («Ես տեսա, թե ինչպես էին կռվում ամերիկացիները»)։
Այդ ժամանակ ՆԱՏՕ-ի կազմում գտնվող բոլոր 28 երկրները մասնակցել են ԱՄՆ-ի գլխավորած պատերազմին Աֆղանստանում։ Դա տեղի է ունեցել, երբ 2001 թվականի սեպտեմբերի 12-ին՝ սեպտեմբերի 11-ի ահաբեկչություններից հաջորդ օրը, դաշինքը գործի է դրել Հյուսիսատլանտյան պայմանագրի հավաքական պաշտպանության մասին 5-րդ հոդվածը։
ՆԱՏՕ-ի պատմության մեջ այդ հոդվածը կիրառվել է միայն մեկ անգամ։
Երկուշաբթի մեկնաբանելով Հեգսեթի հայտարարությունները՝ Մեծ Բրիտանիայի վարչապետ Էնդի Բերնհեմնի պաշտոնական ներկայացուցիչն ընդգծել է, որ «բրիտանական հազարավոր ընտանիքներ և դաշնակից մյուս երկրների զինծառայողների ընտանիքներ հսկայական զոհողություններ են կրել՝ այս պատերազմում կարևոր դեր խաղալով և պաշտպանելով մեր արժեքները»։ Նա հիշեցրել է նաև, որ «ավելի քան 450 բրիտանացի զինծառայող տուն չեն վերադարձել»։
«Նրանց զոհաբերությունը, ինչպես նաև ՆԱՏՕ-ի մյուս երկրների զինծառայողների զոհաբերությունը, արվել է հանուն հավաքական անվտանգության և ի պատասխան մեր դաշնակցի վրա հարձակման»,- հայտարարել է ներկայացուցիչը։
«Մենք չափազանց հպարտ ենք մեր զինված ուժերով, և նրանց ծառայությունն ու ինքնազոհաբերությունը երբեք չեն մոռացվի։ Նրանց դերը թերագնահատելն անթույլատրելի է»,- հավելել է նա։
Կիրակի Լեհաստանի արտգործնախարար Ռադոսլավ Սիկորսկին սոցիալական ցանցերում գրել է, որ Հեգսեթը պետք է իր խոսքերը կրկներ «անհանգիստ Ղազնի նահանգում անվտանգություն ապահովելիս զոհված 44 լեհ զինվորի ընտանիքներին»։
