Ալբանիայում նախկին փոխվարչապետ Բելինդա Բալուկուին պաշտոնապես կոռուպցիայի գործով վերջնական մեղադրանքներ են առաջադրել։ Նրա դեմ գործը կապված է ավելի քան 200 միլիոն եվրո արժողությամբ պետական շինարարական պայմանագրերի բաշխմանը ենթադրյալ միջամտության հետ։ Նախկին պաշտոնյայի դեմ մեղադրանքները դարձել են մայրաքաղաք Տիրանայում հակակառավարական բողոքների առիթներից մեկը։

Ալբանիայի Հատուկ դատախազության տվյալներով, որը զբաղվում է բարձր մակարդակի կոռուպցիայի քննությամբ, Բալուկուին մեղադրում են պետական տենդերների մասնակիցների հավասարության սկզբունքը խախտելու և պասիվ կոռուպցիայի մեջ, այդ թվում՝ բարձրաստիճան պաշտոնյաների մասնակցությամբ։ Նրան նաև վերագրում են հանցավոր ճանապարհով ստացված եկամուտների լվացում։

Բալուկուի դեմ նախնական մեղադրանքները առաջադրվել էին անցյալ տարվա վերջին։ Քննությունը կարծում է, որ 2021 թվականին նա միջամտել է երկու շինարարական պայմանագրերի բաշխմանը, որոնց ընդհանուր արժեքը գերազանցում էր 200 միլիոն եվրոն։ Բալուկուն հերքում է իր մեղքը։ Փետրվարին Ալբանիայի վարչապետ Էդի Ռաման նրան պաշտոնանկ արեց, սակայն նախկին փոխվարչապետին ձերբակալությունից պաշտպանող պատգամավորական անձեռնմխելիությունից զրկելու փորձը հաջողությամբ չպսակվեց։

Երեքշաբթի ցուցարարները հավաքվել էին Տիրանայի Կրթության նախարարության շենքի մոտ և վանկարկում էին՝ «Բալուկուին՝ բանտ»։ Ոստիկանությունը ջրցան մեքենաների և արցունքաբեր գազի օգնությամբ հետ մղեց ցուցարարներին։

Պետական հաստատություններում կոռուպցիան դարձել է ուսանողների ղեկավարած նոր բողոքների առիթներից մեկը, որոնց մասնակիցները պահանջում են Ռամայի հրաժարականը։ Վարչապետը դատապարտել է բռնությունը և հայտարարել, որ կառավարությունը կքննարկի քրեական պատասխանատվության տարիքը նվազեցնելու և 16 տարեկանից ցածր անձանց համար սոցիալական ցանցերն արգելելու հնարավորությունը։