նախընտրելի դարձնելՀայաստանի նախկին վարչապետ Հրանտ Բագրատյանը լրագրողներին հայտարարել է, որ հանրապետության վարչապետ Նիկոլ Փաշինյանը կորցնում է վերահսկողությունը և այդ պատճառով կրկին ընդդիմության դեմ գործի է դնում բռնաճնշումների մեխանիզմները։ Նա նաև քննադատել է իշխանությունների տնտեսական քաղաքականությունը և բացատրել, թե ինչի շուրջ են պայմանավորվել ընդդիմադիր ուժերը Սահմանադրության փոփոխությանը հակազդելուն նվիրված հանդիպման ժամանակ։
«Փաշինյանը կորցնում է վերահսկողությունը։ Նա ձեռից գնում է, և դա նրա թուլության արդյունքն է»,- հայտարարել է Բագրատյանը լրագրողներին ընդդիմադիր ուժերի հանդիպումից հետո։
Նախկին վարչապետի գնահատմամբ՝ տնտեսական աճի և պետական բյուջեի ավելացման մասին Փաշինյանի հայտարարությունները չեն արտացոլում գործերի իրական վիճակը։
«Նա գնում է խորհրդարան և ասում, որ տնտեսական աճը կազմում է 5%, այնինչ պարզվում է՝ նույնիսկ 2% էլ չկա։ Ասում է, որ բյուջեն հասել է 10 միլիարդ դոլարի։ Առաջարկում ես վերահաշվարկել համապատասխան փոխարժեքով, և պարզվում է, որ բյուջեն ավելի փոքր է»,- ասել է Բագրատյանը։
Նա կարծում է, որ գործող իշխանությունը չի ապահովել կայուն ձեռքբերումներ, որոնք կարող էին երաշխավորել Հայաստանի զարգացումը քաղաքական, ռազմական և տնտեսական ոլորտներում։ Նա նշել է, որ երկիրը նաև հակասությունների մեջ է մտել տարբեր գործընկերների, այդ թվում՝ Ռուսաստանի և Եվրամիության հետ։
Մեկնաբանելով ընդդիմադիր ուժերի հանդիպման արդյունքները՝ Բագրատյանը հայտնել է, որ մասնակիցները փաստաթուղթ են ստորագրել, որում ամրագրել են Սահմանադրության փոփոխության դեմ իրենց ընդհանուր դիրքորոշումը. այդ փոփոխությունը նրանք անվանում են «ալիևյան սահմանադրություն»։
Միաժամանակ Բագրատյանն ընդգծել է, որ հանդիպման ընթացքում հետագա կոնկրետ գործողություններ, այդ թվում՝ փողոցային բողոքի ակցիաների հնարավորությունը, չեն քննարկվել։
