նախընտրելի դարձնելՀուլիսի 17-ին ԱԳ նախարար Էդվարդ Նալբանդյանն ընդունել է Կանադայի Համայնքների պալատի անդամներ, Կանադա-Հայաստան խորհրդարանական բարեկամության խմբի փոխնախագահներ Ալեքսանդր Բուլրիսին եւ Ջիմ Կարաջանիսին:
ԱԳՆ լրատվական ծառայությունից հայտնում են, որ, ողջունելով հյուրերին` նախարար Նալբանդյանը նշել է, թե վերջին տարիներին Կանադայի հետ համագործակցության բնագավառում առաջընթաց է արձանագրվել, ինչպես նաեւ ասել, որ Հայաստանը մեծ նշանակություն է տալիս Կանադայի հետ բազմաբովանդակ փոխհարաբերությունների ամրապնդմանն ու խորացմանը:
Հայաստանի արտաքին քաղաքական գերատեսչության ղեկավարը բարձր է գնահատել խորհրդարանական դիվանագիտությունն որպես պետությունների միջեւ հարաբերությունների զարգացման կարեւոր ձեւաչափ եւ ողջունել Կանադայի խորհրդարանի պատգամավորների գործունեությունն ուղղված հայ-կանադական հարաբերությունների զարգացմանը:
Նախարար Նալբանդյանը կարեւորել է նաեւ կանադացի խորհրդարանականների մասնակցությունը Արցախում կայանալիք նախագահական ընտրությունների դիտորդական առաքելությանը, ինչն ԱԳՆ ղեկավարի բնորոշմամբ հնարավորություն է ընձեռում տեղում ծանոթանալու իրողություններին եւ անաչառ պատկերացում կազմելու ընտրական գործընթացների ու միջազգային չափանիշներին դրանց համապատասխանության մասին:
Զրուցակիցներն անդրադարձել են նաեւ մի շարք տարածաշրջանային խնդիրների:
