նախընտրելի դարձնելՀայաստանի ոստիկանությունը շարունակում է հասարակության եւ, առաջին հերթին, լրագրողների հետ կապերի ամրապնդմանն ուղղված աշխատանքը (ֆոտոռեպորտաժ):
Այդ աշխատանքի շրջանակներում, այսօր` հուլիսի 23-ին, Ոստիկանությունը լրագրողների համար կազմակերպել էր այցելություն Դավիթաշենի շրջանում գտնվող ոստիկանության հրաձգարան:
Դժբախտ պատահարներից խուսափելու համար, կրակելու պրակտիկ վարժություններին անցնելուց առաջ մամուլի ներկայացուցիչներին ծանոթացրել են անվտանգության կանոններին, սովորել են քանդել ու հավաքել «Մակարով» ատրճանակը, տեղեկացել ատրճանակի տեխնիկական տվյալների մասին:
Յուրաքանչյուր լրագրողի հնարավորություն է տրվել «Մակարով» ատրճանակից 20 մետր հեռավորությունից արձակել 5 կրակոց: Լավագույն կրակող լրագրողներն արժանացել են պատվոգրերի:
Առաջին տեղը գրավել է «Շանթ» հեռուստաընկերության թղթակից Վարդան Թադեւոսյանը, երկրորդ տեղը գրավել է «Ար» հեռուստաընկերության թղթակից Կարեն Խաչատրյանը, իսկ երրորդ տեղը` «Հ1»-ի լրագրող Հայկ Հովհաննիսյանը:
Գեղեցիկ սեռի ներկայացուցիչ լրագրողները, այդ թվում NEWS.am-ի ֆոտոթղթակից Սոնա Բարսեղյանն, արժանացել են հատուկ պատվոգրերի:
Ոստիկանությունում որոշել են տարվա ընթացքում մի քանի անգամ նմանատիպ միջոցառումներ կազմակերպել: Հնարավոր է, որ հետագայում լավագույն կրակողին որպես մրցանակ գազային ատրճանակ կհանձնեն:
Ոստիկանությունն իր նախաձեռնությունը բացատրում է նրանով, որ ժամանակակից աշխարհում ցանկացած քաղաքացի, հատկապես մամուլի ներկայացուցիչը, պետք է զենքի հետ վարվելու կանոններն իմանա:
