Եվրախորհրդարանի Մարդու իրավունքների հարցերով հանձնաժողովում «Սաֆարովի գործի» վերաբերյալ քննարկումների ժամանակ Լիբերալ-դեմոկրատների դաշինք (ALDE) քաղաքական խմբակցության անդամ Քրիստինա Օյուլանդը  ներկայացրել է իր խմբակցության դիրքորոշումը:

Նրա հայտարարությունը քննարկումները դուրս է բերել ղարաբաղյան հակամարտության խորը արմատների լուծման հարթություն:

Հենց արդյունքների բացակայությունն է լիբերալ-դեմոկրատներին ստիպում նոր ձեւաչափեր փնտրել խնդրի լուծման համար. «Քառյակի» գաղափարը` Եվրամիության  մասնակցությամբ, առաջխաղացման նոր դինամիկայի ներուժ կպարունակի: Օյուլանդի խոսքով` ԵՄ-ն կարեւոր գործընկեր է հակամարտության երկու կողմերի համար էլ: Կովկասկյան երկրներին բարեփոխումների եւ ինտեգրացիոն գործընթացների համար առաջարկված  Արեւելյան գործընկերությունը կարող է եւ պետք է կարեւոր դեր խաղա:

«ԵՄ-ն հակմարտությունների գոտիներում աշխատելու հսկա փորձ ունի: Արեւելյան գործընկերությունը նման է Կայունության մասին համաձայնագրին Բալկաններում, որտեղ ԵՄ քաղաքականությունը շոշափելի արդյունք էր տվել: ԵՄ այդ փորձաքննությունը կարող է ամրապնդել ԵԱՀԿ Մինսկի խմբի ջանքերը, նոր շունչ հաղորդել հակամարտության կարգավորմանը: Իսկ դա արժե, որպեսզի այդ գաղափարին շանս տրվի», ասել է եվրոպացի պատգամավորը:

ALDE խմբակցությունը  չի ստորագրել Սաֆարովի արտահանձնումն ու ներումը դատապարտող բանաձեւը: «Բանաձեւի տեքստը կարող է առկա հակամարտության հետագա սրում առաջացնել»,-հայտարարել է  Օյուլանդը: