Նախագահ Սերժ Սարգսյանն այսօր՝սեպտեմբերի 25-ին, ընդունել է Հայ օգնության ֆոնդի (ՀՕՖ) պատվիրակությանը` Հայ առաքելական եկեղեցու ԱՄՆ արեւելյան թեմի առաջնորդ, Հայ օգնության ֆոնդի նախագահ Խաժակ արքեպիսկոպոս Պարսամյանի գլխավորությամբ: Ինչպես NEWS.am-ին տեղեկացրին նախագահի մամուլի ծառայությունից, հանրապետության նախագահը բարձր է գնահատել Հայ օգնության ֆոնդի հայրենանվեր գործունեությունը, ընդգծելով, որ ՀՕՖ-ը Հայաստանի կողքին է եղել մեր ժողովրդի համար ամենադժվարին պահերին: «Ստեղծվելով 1988-ի Սպիտակի ավերիչ երկրաշարժից անմիջապես հետո՝ ՀՕՖ-ը ոչ միայն աջակցեց, օգնության ձեռք մեկնեց աղետից տուժած մեր ժողովրդին, այլ դրանից հետո էլ շարունակեց մասնակցություն ունենալ նորանկախ Հայաստանի առջեւ ծառացած խնդիրների լուծման գործում, որովհետեւ, ցավոք, երկրաշարժը միակ արհավիրքը չէր, որին մենք պետք է դիմակայեինք»,-ասել է Սերժ Սարգսյանը:

Նախագահը ողջունելի է համարել, որ ֆոնդը Հայաստանում իր օգնության ծրագրերն աստիճանաբար փոխարինում է զարգացման ծրագրերով, ինչը հանրապետության ղեկավարի համոզմամբ, շատ կարեւոր է երկրի զարգացման համար՝ նկատի առնելով, որ նման բնույթի ծրագրերում դրված միջոցներն աշխատում են եւ տեւական ժամանակահատվածում իրենց նպաստը բերում տնտեսության զարգացմանը: Սերժ Սարգսյանն իր եւ ամբողջ հայ ժողովրդի անունից շնորհակալություն է հայտնել ՀՕՖ-ի ղեկավարությանը, բոլոր աշխատակիցներին եւ այն դոնորներին, ովքեր մշտապես իրենց նվիրատվություններով հնարավոր են դարձնում ֆոնդի գոյությունը: «Բոլորիս նպատակն է ունենալ զարգացած, ուժեղ պետություն եւ լավ Հայաստան կառուցելու շուրջ համախմբված ժողովուրդ: Սփյուռքը ուժեղ է Հայաստանով, Հայաստանն էլ ուժեղ է իր սփյուռքով»,-ընդգծել է նախագահը:

Հանդիպմանը ՀՕՖ-ի ատենապետ Ռենդի Սապահ-Գուլյանը Սերժ Սարգսյանին ներկայացրել է տարբեր ոլորտներում ֆոնդի ծրագրերն ու գործունեության հիմնական ուղղությունները: Պատվիրակության անդամների հետ հանրապետության ղեկավարը խոսել է Հայաստանի տնտեսությանը, ներքին եւ արտաքին քաղաքականությանը վերաբերող հարցերի շուրջ, պատասխանել ՀՕՖ-ի անդամներին հետաքրքրող հարցերին: