նախընտրելի դարձնել«Ամուսնացեք, բաժանվեք… ձեր գործն է»: Խորհրդարանում այսօր` հոկտեմբերի 22-ին, լրագրողների հետ զրույցի ընթացքում ասել է Ազգային ժողովի փոխխոսնակ Էդուարդ Շարմազանովը` մեկնաբանելով «Ժառանգություն» խորհրդարանական խմբակցության տարաձայնությունները:
Նրա խոսքով` արդեն մի քանի ամիս է «Ժառանգություն» խմբակցության ներքին տարաձայնություններն ակնհայտ էին: «Ես դա չէի կանխատեսում, պարզապես քաղաքական գործիչը պետք է իրավիճակը մի քանի քայլ առաջ տեսնի: Եւ սա տարբերակներից մեկն էր: Խմբակցության տարաձայնություններն ակնհայտ էին այս կամ այն հարցի քվեարկության դեպքում: Անուն չեմ նշի, բայց նույն իրավիճակն է մեկ այլ խմբակցությունում, որի անդամները տարբեր կերպ են քվեարկում, այն դեպքում, երբ պետք է խմբակցության միասնական դիրքորոշումը ներկայացնեն»,- նշել է փոխխոսնակը` ակնարկելով ընդդիմադիր «Հայ ազգային կոնգրես» խմբակցությանը:
Շարմազանովը նաեւ նշել է, որ խմբակցության անդամները պետք է միակարծիք լինեն, մինչդեռ եթե քվեարկության ժամանակ «Ժառանգություն» խմբակցության ղեկավար Ռուբեն Հակոբյանը քվեարկում է մի կերպ, իսկ Ալեքսանդր Արզումանյանը եւ Խաչատուր Քոքոբելյանը` այլ, ապա Զարուհի Փոստանջյանն էլ քվեարկում է իր հայեցողությամբ: «Դրանից ելնելով` կարելի է ենթադրել այդ խմբակցության հետագա ճակատագիրը: Ես դեմ եմ որեւէ արհեստական երեւույթի` լինի դա հարսանիք կամ քաղաքական միություն»:
Բացի դրանից, Շարմազանովը նշել է, որ այն խմբակցությունները, որոնցում տարաձայնություններ կան, նախագահի թեկնածու առաջադրելու հնարավորություն չունեն , քանի որ ամեն ինչին հետեւող ժողովուրդը դժվար թե լուրջ ընդունի նման քաղաքական ուժի թեկնածուին:
