Ռուսաստանի իրավապահ մարմինների կողմից գողական հավաքույթի ժամանակ   ձերբակալված օրենքով գող Սուրեն Ավետիսյանն արտաքսվել է երկրից, քանի որ խախտել է  Ռուսաստանի տարածքում օտարերկրացիների գտնվելու կարգը:

Միաժամանակ, Հայաստանի ոստիկանությունում հայտնեցին, որ Ավետիսյանը Հայաստանի իրավապահների տեսադաշտում չի գտնվում, եւ իրենք ոչ մի առնչություն չունեն Ավետիսյանի արտաքսման հետ:

Հիշեցնենք, որ նախօրեին տեղեկատվություն էր տարածվել այն մասին, որ  ռուսաստանցի իրավապահների կողմից հոկտեմբերի  28 –ին Մոսկվայի ռեստորաններից մեկում «գողական հավաքույթն» ընդհատվել է: Հատուկ գործողությունների արդյունքում ձերբակալվել են հինգ քրեական հեղինակություն, որոնցից երկուսը` հայաստանցիներ` 33 տարեկան Արտեմ Առաքելյանը կամ Արտեմ Լիպեցկին եւ 39 –ամյա Սուրեն Ավետիսյանը (Սուրենչիկ): Առաքելյանի նկատմամբ որպես խափանման միջոց է ընդունվել կալանքը:

Հաղորդվում է, որ վերջին կես տարվա ընթացքում Արտեմ Լիպեցկին մեկ անգամ չէ, որ հայտնվել է քրեական քրոնիկայում եւ լրատվամիջոցների ուշադրության կենտրոնում: Ամռան սկզբում Դեդ Հասանի (Ասլան Ուսոյան)  կլանի  անդամների կողմից Արտեմը «թագադրվել էր» որպես  օրենքով գող: