նախընտրելի դարձնելՀայ-լեհական հարաբերությունների պատմությունն սկսվում է միջնադարից, այսօր երկու երկրները համագործակցում են իբրեւ ազատ, անկախ պետություններ: Այդ մասին այսօր՝ նոյեմբերի 21-ի մամուլի ասուլիսում նշել է Հայաստանում Լեհաստանի դեսպան Զդիսլավ Ռաչինսկին՝ անդրադառնալով Լեհաստանի եւ Հայաստանի միջեւ դիվանագիտական հարաբերությունների հաստատման 20-ամյակին:
Դիվանագետի խոսքով՝ երկու երկրների համագործակցությունը բազմակողմանի է, ներառում է ոչ միայն կառավարությունների մակարդակով հարաբերություններ, այլեւ այլ ասպարեզներում. «Երկու երկրների հարաբերությունները գործընկերային են՝ փոխվստահության վրա հիմնված»:
Անդրադառնալով տնտեսական հարաբերություններին՝ դեսպանը նշել է, որ տարեկան ապրանքաշրջանառությունը կազմում է 30 մլն եվրո, ինչը, ըստ նրա, անբավարար ցուցանիշ է, քանի որ տարիների ընթացքում առաջընթաց չի գրանցվել:
«Պատճառն այն է, որ հաճախ Լեհաստանից ապրանքները Հայաստան են հասնում Ռուսաստանի, Ուկրաինայի եւ Թուրքիայի միջոցով, ինչը խոչընդոտում է ապրանքաշրջանառության աճին», - ասել է Ռաչինսկին՝ նկատելով, որ Հայաստանում լեհական ընդամենը մեկ ընկերություն է գործում՝ 10 մլն եվրոյի շրջանառությամբ:
