ՆախընտրելիCuriosity առաքելության շրջանակներում Մարսի հետազոտությամբ զբաղվող գիտնականները դեկտեմբերի 3-ին պաշտոնական բացատրություն կներկայացնեն «պատմական նշանակության գտածոյի» վերաբերյալ: Աշխատանքների ղեկավար Ջոն Գրոտցինգերը եւ նրա գործընկերները մամուլի ասուլիս կտան Սան Ֆրանցիսկոյում, որտեղ բացվում է Ամերիկյան երկրաֆիզիկական միության ամենամյա նիստը:
Գրոտցինգերի խոսքերը, թե մարսագնացի հայտնաբերած տվյալները «կհայտնվեն պատմության դասագրքերում», իրարանցում էին առաջացրել մամուլում եւ գիտական ֆանտաստիկայի սիրահարների շրջանում: Ռեակտիվ շարժման լաբորատորիայի ղեկավար Չարլզ Էլաչին պարզաբանել էր, որ խոսքը օրգանական մոլեկուլների մասին է:
Այդ ամենը NASA-ին ստիպել էր հանդես գալ հերքմամբ: Գրոտցինգերի գործընկերները բացատրում են, որ լրագրողները սխալվել են, որ նրա հայտարարությունը վերաբերել է Մարսի մակերեւույթի վերջին ուսումնասիրություններին, մինչդեռ իրականում գիտնականը խոսել է Curiosity-ի պատմական առաքելության մասին ընդհանրապես:
Գրոտցինգերն անձամբ անուղղակիորեն հաստատել է դա Space.com կայքի տեսահարցազրույցում: Չբացահայտելով վերջին հետազոտությունների արդյունքները` նա պատմել է մարսագնացի մասին: Հողի վերցման եւ մշակման գործընթացը նույնպես ցուցադրվում է տեսագրության մեջ:
Պարզվել է, որ վերցված հողը բաղկացած է երկու հիմնական բաղադրիչներից: Առաջինն ամուր հանքային տարրեր են: Երկրորդ բաղադրիչն անձեւ է: Գրոտցինգերի խոսքով՝ հետազոտողների գլխավոր հարցերից է երկրորդ բաղադրիչի բնույթը պարզելը:
