Աշգաբադում այսօր՝ դեկտեմբերի 4-ին կայացել է ԱՊՀ  արտաքին գործերի նախարարների խորհրդի հերթական նիստը:

Հանդիպման մասնակիցները քննարկել են բազմակող համագործակցության խնդիրները, կարծիքներ փոխանակել  միջազգային օրակարգում փոխադարձ հետաքրքրություն ներկայացնող հարցերի շուրջ, հայտնում է Ռուսաստանի ԱԳՆ-ի պաշտոնական կայքը: 

Հավանության է արժանացել համակողմանի համագործակցության հետագա զարգացման հայտարարագրի նախագիծը, որը նախատեսվում է ընդունել դեկտեմբերի 5-ին կայանալիք ԱՊՀ երկրների պետությունների ղեկավարների հանդիպման շրջանակում:

Ավանդույթի համաձայն՝ էական ուշադրություն է դարձվել հումանիտար ոլորտում փոխգործակցության զարգացմանը: Համաձայնեցվել է 2013-2014 թթ. ԱՊՀ երկրների հումանիտար համագործակցության ոլորտում հեռանկարային միջոցառումների ծրագրի նախագիծը: Քննարկվել են  հաջորդ տարի «Համագործակցության մշակութային մայրաքաղաքները» միջպետական ծրագրի իրականացման հարցերը Գաբալա (Ադրբեջան), Գյումրի (Հայաստան) եւ Մոգիլեւ (Բելառուս) քաղաքներում: Հավանություն է ստացել Շրջակա միջավայրի պահպանության ոլորտում  համագործակցության համաձայնագիրը:

Համաձայնեցվել եւ հաստատման համար պետության ղեկավարներին կներկայացվի 1941-1945թթ. Հայրենական մեծ պատերազմում հաղթանակի 70-ամյակի միջոցառումների կազմակերպման նախագիծը:

Հավանության են արժանացել ահաբեկչության եւ ծայրահեղականության դեմ պայքարին, զինվորական կրթության զարգացմանն ուղղված կոլեկտիվ փոխգործակցության մասին համաձայնագրերի նախագծերը: Լսվել է տեղեկատվություն ԱՊՀ մի շարք մամինների ոլորտային համագործակցության գործունեության վերաբերյալ:

ԱԳՆ ղեկավարների խորհրդի նիստում ընդունված փաստաթղթերի մի մասը կներկայացվի ԱՊՀ պետությունների ղեկավարների եւ կառավարությունների խորհրդի քննարկմանը: