Եգիպտոսում Մուրսիի կողմնակիցների եւ հակառակորդների բախումների զոհերի թիվը հասել է չորսի:

Ըստ շտապօգնության ծառայության  տվյալների` վիրավորների թիվը հասնում է 350-ի:  Սակայն բժիշկները չեն կարողանում ժամանակին հասնել բախումների վայր եւ տուժածներին օգնություն ցուցաբերել: 

Հայտնի է, որ տուժածների շարքում տեղական թերթի մեկ լրագրող կա, որի կյանքի համար բժիշկները պայքարում են, հայտնում է vesti.ru-ն:

Ըստ «ՌԻԱ Նովոստիի»` Եգիպտոսի նախագահ Մուհամեդ Մուրսիի ներկայացրած սահմանադրական հայտարարագրի կողմնակիցները եւ հակառակորդները միմյանց վրա քարեր, փայտեր են նետել, այրվել են մեքենաներ:

Դեկտեմբերի 6-ին համատեղ հայտարարությամբ են հանդես եկել Եգիպտոսի դիվանագիտական կորպուսի ներկայացուցիչները, որոնք դատապարտել են «արյունալի իրադարձությունների բոլոր մասնակիցներին»:

Շուրջ հարյուր դիվանագետ հրաժարվել են մասնակցել նոր սահմանադրության նախագծի հանրաքվեի մոնիտորինգին:
Ավելի վաղ Եգիպտոսի նախագահ Մուհամեդ Մուրսին հրահանգել էր բռնություն չգործադրել ցուցարարների նկատմամբ: Նա ընդգծել էր, որ աշխատակազմը պատասխանատվություն չի կրում Կահիրեի բախումների համար:

Հիշեցնենք, որ Կահիրեի Գելիոպոլիս թաղամասում իրադրությունը սրված է, այնտեղ հավաքվել են «Մահմեդական եղբայրների» հազարավոր կողմնակիցներ եւ քանդել ընդդիմության տեղադրած վրանները: Բռնկվել էին բախումներ, կռվին միացել են նաեւ ֆուտբոլային ակումբների երկրպագուները: