Բուսակերները սրտային հիվանդություններից ավելի հազվադեպ են մահանում, քան մսակերները: Թվային արտահայտությամբ՝ ռիսկայնության տարբերությունը կազմում է 32%:

Օքսֆորդի համալսարանի գիտնականները պնդում են, որ սիրտանոթային հիվանդությունները զարգացած երկրներում մահացության հիմնական պատճառն են:

Ըստ գիիտնականների՝ երկու խմբերի միջեւ ռիսկի տարբերությունը հիմնականում բացատրվում է խոլեստերինի եւ արյան ճնշման մակարդակով:

Սննդի եւ սրտային հիվանդությունների հարցերով խոշորագույն հետազոտությանը մասնակցել են ավելի քան 45 հազար կամավորներ Անգլիայից եւ Շոտլանդիայից, որոնցից 34%-ը բուսակեր է: 1990թ. բոլոր մասնակիցներն առողջության եւ կենսակերպի վերաբերյալ հարցերի են  պատասխանել: Մոտավորապես 20 հազար մասնակից նաեւ գրառել են  արյան ճնշման  ցուցանիշները եւ խոլեստերինի մակարդակի չափման համար արյուն են հանձնել: Դիտարկումներն արվել են մինչեւ 2009թ.:   

Ուսումնասիրության ընթացքում գիտնականները սրտանոթային հիվանդությունների 1235 դեպք են գրանցել՝ ներառյալ  մահվան 169 եւ հիվանդանոց տեղափոխվելու 1066 դեպքեր:

Բուսակերներն արյան ճնշման եւ խոլեստերինի մակարդակի  ավելի ցածր ցուցանիշներ են ունեցել: Բացի դրանից նրանք ավելի նիհար են եւ ավելի քիչ են տառապում շաքարախտով: