նախընտրելի դարձնելԲրազիլիայում հունիսի 20-ի բողոքի ցույցերին մասնակցել է շուրջ 800 հազար մարդ: Ամենազանգվածայինը եղել է Ռիո դը Ժանեյրոյի բողոքի ցույցը, որտեղ փողոց է դուրս եկել 300 հազար մարդ:
Ցուցարարները բախվել են ոստիկանների հետ, որոշ դեպքերում բողոքավորներին ցրելու համար ոստիկանները կիրառել են ռետինե փամփուշտներ եւ արցունքաբեր գազ, գրում է «Նեզավիսիսմայա գազետան»:
Մայրաքաղաք Բրազիլիայում բողոքի ցույցի հետեւանքով տուժել է արտգործնախարարության շենքը: Ծայրահեղական երիտասարդների մի խումբ գրոհել է շենքը: Ոստիկանությունը հետ է մղել հարձակվողներին` կիրառելով մահակներ եւ արցունքաբեր գազ: Բախման ընթացքում կոտրվել են ԱԳՆ-ի շենքի մի քանի ապակիներ եւ ապակյա դռներ, հաղորդում է ԻՏԱՌ-ՏԱՍՍ-ը: Մուտքի մոտ բռնկված հրդեհն արագ մարվել է: Ձերբակալվել է երկու մարդ, տասնյակն մարդ վիրավորվել է: Ավելի վաղ ցուցարարների մի մասն ապարդյուն փորձել էր ներխուժել խորհրդարանի շենք եւ նախագահական պալատ: Այդ շենքերը շրջապատված են ոստիկաններով եւ զինծառայողներով:
Սան Պաուլու նահանգի Ռիբեյրան Պրետու քաղաքում բողոքի ցույցերը ողբերգությամբ են ավարտվել: Անհայտ անձը մեքենայով մխրճվել է ցուցարարների խումբ: Երեք մարդ վիրավորվել է եւ տեղափոխվել հիվանդանոց, իսկ 18-ամյա Մարկուս Դելեֆրատեն տեղում մահացել է:
«Մոսկովսկի կոմսոմոլեցը» գրում է, որ Բրազիլիայի Սալվադոր քաղաքում բողոքողները քարեր են նետել ՖԻՖԱ-ի երկու ավտոբուսների վրա: Բողքողները կոտրել են նաեւ Hotel Sheraton հյուրանոցի ապակիներից մեկը, ուր տեղավորվել են ՖԻՖԱ-ի անդամները: Սալվադորում տեղի է ունեցել Կոնֆեդերացիայի գավաթի խաղը Նիգերիայի եւ Ուրուգվայի միջեւ:
Բրազիլիայում բողոքները սկսվել էին այն բանից հետո, երբ հունիսի սկզբին Սան Պաուլուում եւ Ռիո դը Ժանեյրոյում բարձրացրել էին հասարակական տրանսպորտի ուղեվարձը: Հունիսի 19-ին երկու քաղաքների իշխանությունները վճռել էին նվազեցնել սակագները նախկին մակարդակին, սակայն հետագա իրադարձությունները ցույց տվեցին, որ դա չհանդարտեցրց կրքերը: Ցույցերի մասնակիցներն այժմ ավելի մեծ սոցիալ-տնտեսական պահանջներ են ներկայացնում:
Ներքին բարդ իրադրության պատճառով Բրազիլիայի նախագահ Դիլմա Ռոուսեֆը հունիսի 20-ին վճռել է հետաձգել պաշտոնական այցը Ճապոնիա:
