նախընտրելի դարձնելՔաղաքապետարանի դիմացից բողոքի ակցիայի մասնակիցների մի մասը երթով ժամանել է ոստիկանության կենտրոնականի բաժին, որտեղ բերման է ենթարկվել ակտիվիստ Արգիշտի Կիվիրյանը, հաղորդում է NEWS.am-ի թղթակիցը:
Ակտիվիստները պահանջում են անհապաղ ազատ արձակել բռնի ուժով բերման ենթարկված ակտիվիստին: Ակցիայի մասնակիցները բարձրախոսով հայտարարեցին, որ ոստիկանության գործողությունները եղել են անհամաչափ եւ նրանք Արգիշտի Կիվիրյանին ծեծելով են մտցրել ոստիկանական մեքենան:
Այդ ընթացքում ակցիայի մասնակիցներից մեկին զանգահարեցին քաղաքապետարանի մոտ մնացած ակտիվիստները եւ հայտնեցին, որ ոստիկանները վերադարձրել են գողացված պաստառները:
Ոստիկանության կենտրոնականի բաժինը շրջապատված է ոստիկաններով: Իրավիճակն այս պահին հանգիստ է:
Հիշեցնենք, որ այսօր առավոտյան, «Չենք վճարելու 150 դրամ» շարժման ակտիվիստները փորձում էին վրան տեղադրել Երեւանի քաղաքապետարանի դիմաց, իսկ ոստիկանները թույլ չէին տալիս: Ոստիկանություն բերման է ենթարկվել ակտիվիստներից Արգիշտի Կիվիրյանը:
Ականատեսները NEWS.am-ին պատմեցին, որ Արգիշտի Կիվիրյանին հարվածելով են բերման ենթարկել: «Ուժեղ հարվածեցին վզին, գլխին, մեջքին եւ մոտ մեկ տասնյակի հասնող ոստիկաններով, ոտքերից ու ձեռքերից բռնած մտցրեցին ոստիկանության մեքենան»,-ասաց ականատես կանանցից մեկը՝ հավելելով, որ ակտիվիստը դիմադրություն ցույց չի տվել, միայն ոստիկաններին ասել է վրաներից ձեռք մի տվեք:
Երեւանի փոխոստիկանապետ Վալերի Օսիպյանը հայտարարել է, որ բերման կենթարկվեն եւ վարչական պատասխանատվության կենթարկվեն բոլոր նրանք, որոնք կփորձեն վրան տեղադրել:
Ոստիկանների եւ ակտիվիստների միջեւ քաշքշուկի ժամանակ մի կին է ուշաթափվել:
Լուսանկարը՝ Արսեն Սարգսյանի/NEWS.am
