նախընտրելի դարձնելՀԱԿ գրասենյակի վրա հարձակված եւ սպանության սպառնալիք տված քաղաքացին հայտնաբերվել է: Այս մասին NEWS.am-ը տեղեկացավ ոստիկանության լրատվական ծառայությունից: Ոստիկանությունից փոխանցեցին, որ նոյեմբերի 1-ին, ժամը 12.35-ին, ոստիկանության Երևան քաղաքի վարչության օպերատիվ կառավարման կենտրոնից Կենտրոնական բաժին ահազանգ է ստացվել, որ իրենց է զանգահարել մի քաղաքացի և հայտնել, որ Սարյան 38 հասցեում երկու դանակներով զինված մի տղամարդ սպառնալիքներ է տվել:
Մեկնած օպերատիվ խումբը պարզել է, որ ահազանգից կես ժամ առաջ, մոտ 50-55 տարեկան մի տղամարդ մտնելով հիշյալ հասցեում գտնվող Հայ ազգային կոնգրեսի գրասենյակ՝ սպանության սպառնալիքներ է տվել: Նույն օրը ոստիկանության Երևան քաղաքի վարչության քրեական հետախուզության բաժնի, Լոռու մարզային վարչության և Սպիտակի բաժնի աշխատակիցների ձեռնարկած օպերատիվ-հետախուզական միջոցառումների արդյունքում պարզվել է, որ սպառնալիքներ տված անձը Սպիտակ քաղաքի բնակիչ, 1957 թվականին ծնված Արսեն Օհանյանն է:
Նոյեմբերի 2-ին, ժամը 1.15-ին, Օհանյանը հայտնաբերվել է Երևանի Թումանյան 3 շենքի մոտ ու բերման ենթարկվել ոստիկանության Կենտրոնական բաժին, որտեղ տվել է խոստովանական բացատրություն: Անձնական խուզարկությամբ Արսեն Օհանյանի մոտ հայտնաբերվել են հանցագործության գործիք հանդիսացող երկու դանակները՝ շեղբի 11 սանտիմետր երկարությամբ: Քննությունը շարունակվում է:
Ավելի վաղ NEWS.am-ը հայտնել էր, որ այսօր՝ նոյեմբերի 1-ին, ժամը 12.00-ից հետո, անհայտ անձը ներխուժել է Հայ ազգային կոնգրեսի կենտրոնական գրասենյակ եւ ձեռքերին ունենալով երկու դաշույններ՝ սպառնալիքներ է տեղացել Կոնգրեսի ղեկավարության հասցեին ու դիմել փախուստի: Այս մասին NEWS.am-ին հայտնել էր ՀԱԿ մամուլի խոսնակ Արման Մուսինյանը: Կոնգրեսի ներկայացուցիչներն ահազանգել են ոստիկանություն եւ տվել համապատասխան վկայություններ:
