Երեւանի Դավթաշեն վարչական շրջանում մարտի 18-ին կայացել է  Արդարադատության ակադեմիայի բացումը, որին ներկա է գտնվել ՀՀ նախագահ Սերժ Սարգսյանը  (ֆոտոռեպորտաժ):

Ակադեմիայի հիմնադիրն է Հայաստանի Հանրապետությունը: Համաձայն «Արդարադատության ակադեմիայի մասին» օրենքի՝ ակադեմիայի կառավարումն իրականացնում է Ակադեմիայի կառավարման խորհուրդը, որի կազմում ներառված են արդարադատության նախարարը, երեք դատավոր եւ երեք դատախազ: Ակադեմիայի աշխատանքը ղեկավարում է ռեկտորը, որն ընտրվում է 5 տարի ժամկետով: 2013—ի նոյեմբերի 15-ին առաջին  ռեկտոր էր ընտրվել  իրավաբանական գիտությունների թեկնածու, դոցենտ Ռուբեն Մելիքյանը:

Ակադեմիայի շինարարության համար ծախսվել է 850 մլն դրամ:

Ակադեմիայի բացման արարողությանը ՀՀ արդարադատության ժամանակ նախարար Հրայր Թովմասյանն ընդգծել է, որ հաստատության գլխավոր նպատակն է  ճիշտ գնահատել դատավորների եւ դատախազների թեկնածուներին՝ այդ պաշտոններում բացառելով հարկ եղած գիտելիքներին չտիրապետող անձանց եւ նրանց, ովքեր ակադեմիայում համապատասխան քննությունները չեն հանձնել:

Ըստ առաջին ռեկտոր Ռուբեն Մելիքյանի՝ Արդարադատության ակադեմիայի գործունեության առաջնահերթ նպատակը դատավորների եւ դատախազների համար մեկ միասնական կրթական քաղաքականություն իրականացնելն է: Նա նաեւ նշել է, որ Ակադեմիան հաստիքով դասախոսներ առայժմ չունի:  «Մենք ուսումնական գործընթացում ներդրել ենք այսպես կոչված հրավիրված դասախոսների ձեւաչափը: Ակադեմիայում ուսումնական գործընթացը սկսվում է ցուցակում ներառված դատավորների եւ դատախազների թեկնածուների մասնագիտական պատրաստվածությունից:

Դատավորների  20 եւ դատախազների 15 թեկնածուների ուսումնական դասընթացը կտեւի  8,5 ամիս, որը ներառում է ուսուցում լսարաններում եւ փորձաշրջան:  Ուսուցման ծրագրով նախատեսվում է 30 առարկայի  դասավանդում:

Հիշեցնենք, որ նախքան Արդարադատության ակադեմիայի ստեղծումը,  դատավորներ եւ դատախազներ պատրաստում էին համապատասխան  դպրոցները:

Լուսանկարը՝ Արսեն Սարգսյանի/ NEWS.am