Եվրասիական տնտեսական հանձնաժողովի նիստում Բելառուսը եւ Ղազախստանը հավանություն չեն տվել Ռուսաստանի առաջարկությանը` Ուկրաինայից ներմուծվող ապրանքերի մաքսատուրքերի բարձրացման վերաբերյալ, գրում է «Վեդոմոստի» թերթը` վկայակոչելով դաշնային պաշտոնյային:

Նախօրեին Ուկրաինան ստորագրել է ԵՄ-ի հետ ասոցացման համաձայնագրի տնտեսական հատվածը: Փաստաթուղթը ենթադրում է ներմուծման հարկերի զրոյացում:  ՌԴ իշխանությունները բազմիցս ասել են, որ  Ուկրաինայի կողմից համաձայնագիրը ստորագրելուց հետո, բացասական հետեւանքների դեպքում, Ռուսաստանը ներքին շուկան կպաշտպանի Եվրոպայից առանց հարկերի ապրանքների հոսքից:

Ուկրաինան շարունակում է մնալ ԱՊՀ ազատ առեւտրի գոտու անդամ: ՄՄ անդամների աջակցության բացակայության դեպքում  Ռուսաստանն իրավունք ունի միակողմանի միջոցներ ձեռնարկել:

Նշվում է, որ ուկրաինական ներմուծումից սեփական շուկան պաշտպանելու նպատակով, Ռուսաստանը կարող է օգտագործել ԱՊՀ-ի ազատ առեւտրի վերաբերյալ պայմանագրին կից  6-րդ դրույթը, որը հնարավորություն է տալիս չեղյալ հայտարարել նախապատվությունները, եթե  ներմուծման աճող ծավալը վնասում է տնտեսությանը: Զրոյական հարկը կարող է փոխարինվել միասնական մաքսային հարկով` ըստ ԱՀԿ-ի կանոնների, հետեւաբար  Ուկրաինայից ներմուծվող ապրանքների մաքսատուրքերը կարող են կազմել 7,1%: