Ասիայում համագործակցության եւ անվտանգության կոնֆերանս,  պետությունների եւ կառավարությունների ղեկավարների 3-րդ համաժողովի շրջանակներում Թուրքիայի նախագահ Աբդուլլահ Գյուլը հանդիպել է Իրանի, Աֆղանստանի եւ Ղազախստանի նախագահների հետ։

Թուրքական Ihlassondakika կայքէջի փոխանցմամբ՝  Չրաղան պալատում տեղի ունեցած հանդիպումների գլխավոր թեման եղել է Իսրայելի հետ կապված խնդիրը։  Մասնավորապես, Թուրքիայի նախագահը կրկնել է օրեր առաջ ասածը, ըստ որի եթե  Իսրայելը չգնա ընդունելի  որեւէ կարգավորման, Թուրքիան Իսրայելին չի ներելու։ Իրանի նախագահ Մահմուդ Ահմադինեժադը  այդ խնդրում իր աջակցությունն է հայտնել Թուրքիային, եւ  անընդունելի  համարել Իսրայելի զինվորականների գործողությունները օգնություն տանող նավերի դեմ։

Աբդուլա Գյուլը ԵԱՀԿ նախագահությունը ստանձնած Ղազախստանի նախագահի հետ հանդիպմանը քննարկել է էներգետիկ խնդիրները, ինչպես նաեւ Ղրղըզըստանի շուրջ տեղի ունեցող վերջին զարգացումները։