նախընտրելի դարձնելԻրանն արդեն արտադրել է մինչեւ 20 տոկոս հարստացված 17 կգ ուրան: Այս մասին հայտարարել է Իրանի ատոմային Էներգիայի կազմակերպության ղեկավար Ալի Աքբար Սալեհին: Նա նշել է, որ Թեհրանը մտադիր չէ արտադրել միջուկային այնպիսի նյութերի տարատեսակներ, որոնց կարիքը երկիրը չունի, եւ չի պատրաստվում ստեղծել վառելիքի պաշարներ, որոնք բացառապես մինչեւ 20 տոկոս ուրանից են կազմված:
Խոսելով իրանցի ատոմային մասնագետների հաջողություններից՝ Սալեհին ասել է, որ հիմա անցկացվում են երրորդ սերնդի ցենտրիֆուգի թեստավորման աշխատանքները: ISNA-ի հաղորդմամբ, միեւնույն ժամանակ նա նշել է, որ մասնագետներն արդեն սկսել են չորրորդ սերնդի ցենտրիֆուգ ստեղծելու աշխատանքները: Սալեհին հերթական անգամ նշել է, որ Իրանը մտադիր չէ ստեղծել սեփական միջուկային զենքը եւ խախտել միջուկային զենքի չտարածման մասին համաձայնագիրը:
Նշենք, որ իրավիճակը Իրանի ատոմային ծրագրի շուրջ սրվել էր այն բանից հետո, երբ փետրվարի 11-ին Իրանի Իսլամական Հանրապետության նախագահ Մահմուդ Ահմադինեջադը հայտարարեց, թե Թեհրանը արտադրել մինչեւ 20 տոկոս հարստացված ուրանի առաջին պաշարները: Նա նաեւ հայտարարել էր, որ մտադիր է եռապատկել քիչ հարստացված ուրանի արտադրության ծավալները:
2010 թվականի հունիսի 9-ին, ՄԱԿ-ի Անվտանգության խորհուրդը բանաձեւ է ընդունել, որով նոր պատժամիջոցներ են սահմանվում Իրանի նկատմամբ, քանի որ վերջինս հրաժարվել է դադարեցնել ուրանի հարստացման աշխատանքները:
