Հունիսի 11-ին Հայաստանի արտաքին գործերի նախարար Էդվարդ Նալբանդյանն ընդունեց Իրանի արտգործնախարարի տեղակալ Էբրահիմ Ռահիմ Փուրին, ով Երեւան է ժամանել միջգերատեսչական խորհրդատվություններին մասնակցելու նպատակով:

Ողջունելով հյուրին՝ նախարար Նալբանդյանը նշեց, որ Հայաստանը եւ Իրանը կապված են ավանդական ջերմ, փոխշահավետ հարաբերություններով, որոնց վկայությունն է միջպետական բարձր մակարդակի երկխոսությունը, տարբեր բնագավառներում ակտիվ փոխգործակցությունը:

Շնորհակալություն հայտնելով ընդունելության համար՝ փոխարտգործնախարար Ռահիմ Փուրը Էդվարդ Նալբանդյանին փոխանցեց Իրանի ԱԳ նախարար Մոհամադ Ջավադ Զարիֆի բարեմաղթանքները։ Էբրահիմ Ռահիմ Փուրն ընդգծեց, որ Իրանը կարեւորում է հարեւան Հայաստանի հետ բարեկամական հարաբերությունների ամրապնդումը եւ համագործակցության ընդլայնումը:

Զրուցակիցներն անդրադարձան երկկողմ օրակարգի բազմաթիվ հարցերի, կարեւորեցին միջխորհրդարանական ձեւաչափով փոխգործակցությունը, քննարկեցին հայ-իրանական առեւտրատնտեսական համագործակցության զարգացման նպատակով ձեռնարկվող քայլերը: Այս համատեքստում արծարծվեց համատեղ տրանսպորտային եւ էներգետիկ նախագծերի իրականացումը:

Զրուցակիցները մտքեր փոխանակեցին մի շարք հրատապ միջազգային եւ տարածաշրջանային խնդիրների շուրջ։

Փոխնախարար Ռահիմ Փուրը Հայաստանի արտգործնախարարին ներկայացրեց Իրանի միջուկային ծրագրի շուրջ ընթացող բանակցային գործընթացի վերջին զարգացումները։

Նախարար Նալբանդյանը ներկայացրեց ղարաբաղյան հիմնախնդրի խաղաղ կարգավորման ուղղությամբ ձեռնարկվող ջանքերը։