Հունիսի 25-ին Հայաստանի պաշտպանության նախարար Սեյրան Օհանյանի գլխավորած պատվիրակությունը ՆԱՏՕ-ի կենտրոնակայանում (Բրյուսել) մասնակցել է Աֆղանստանում իրականացվող ՆԱՏՕ-ի ղեկավարած «Վճռական Աջակցություն» վարժական, աջակցության եւ խորհրդատվական առաքելությանը մասնակցող երկրների պաշտպանության նախարարների ձեւաչափով  հանդիպմանը: ՆԱՏՕ-ի եւ գործընկեր երկրների նախարարները քննարկել են Աֆղանստանում ՆԱՏՕ-ի առաքելության առաջընթացը, քաղաքական եւ անվտանգության  իրավիճակը, որոշում են կայացրել մինչեւ 2016թ. մայիսի 1-ը առաքելության երկրորդ փուլին անցնելու վերաբերյալ, որի համաձայն նախատեսվում է ՆԱՏՕ-ի ներկայությունը սահմանափակել միայն մայրաքաղաք Քաբուլի շրջանակներում: Նախարար Օհանյանը վերահաստատել է մինչեւ առաքելության ավարտը 131 հոգանոց զորախմբի սահմաններում Աֆղանստանում ռազմակայանների անվտանգության ապահովում իրականացնող հայկական զորախմբի մասնակցության  վերաբերյալ Հայաստանի հանձնառությունը:

Այցի ծրագրի շրջանակներում պաշտպանության նախարարը մասնակցել է նաեւ Աֆղանստանում ՆԱՏՕ-ի հյուսիսային հրամանատարության շրջանակային երկրի՝ Գերմանիայի նախաձեռնած նախարարների խորհրդակցությանը, որտեղ քննարկվել են առաքելության ռազմավարական եւ մարտավարական հարցեր:

Նույն օրը պաշտպանության նախարար Սեյրան Օհանյանը հանդիպել է Վրաստանի նորանշանակ պաշտպանության նախարար Թինաթին Խիդաշվիլիի հետ: Նախարարները քննարկել են պաշտպանական համագործակցության հեռանկարներն ու հնարավորությունները, կարծիքներ են փոխանակվել միջազգային եւ տարածաշրջանային անվտանգության խնդիրների շուրջ: