Հայաստանի վարչապետ Տիգրան Սարգսյանն  այսօր` օգոստոսի 23-ին, Ծաղկաձորում մասնակցել է Հայաստանի երիտասարդական հիմնադրամի նախաձեռնությամբ կազմակերպված «Բազե 2010» երիտասարդական հավաքի բացման արարողությանը, որին հրավիրվել էին 18-ից 30 տարեկան ավելի քան 280 երիտասարդներ Հայաստանից, Արցախից, եւ Ջավախքից։

Տիգրան Սարգսյանն իր խոսքում նշել է, որ տարին առանձնահատուկ է համահայկական բնույթ ունեցող  երիտասարդական միջոցառումների առատությամբ եւ կառավարությունը ջանքեր չի խնայի, որպեսզի խթանի երիտասարդական շարժումը Հայաստանում։ Ըստ նրա` «Բազեի» երիտասարդական հավաքները  կարող են լավագույն գործիքներից մեկը հանդիսանալ`  համախմբվելու, երիտասարդական շարժման մեջ համատեղ ծրագրեր մշակելու, նոր մշակույթ ներդնելու առումով։

Տիգրան Սարգսյանը միջոցառման մասնակիցներին շնորհավորել է նաեւ Անկախության Հռչակագրի ընդունման 20-րդ տարեդարձի կապակցությամբ.«Օրն առանձնահատուկ  է նաեւ նրանով, որ հայ ժողովուրդն այսօր նշում է անկախության հռչակագրի ընդունման քսաներորդ տարին։ Ձեզանից շատերը ծնվել են հենց այն օրերին, երբ մենք ձեւավորում էինք Հայաստանի Հանրապետության հիմքերը»:

Վարչապետն իր խոսքում ընդգծել է նաեւ երիտասարդության որակյալ կրթություն ստանալու կարեւորությունը. «Գաղտնիք չէ, որ ժամանակակից աշխարհում մրցակցային առավելություն ունենում են այն  ազգերը, որոնք էական նշանակություն են  տալիս  կրթությանը եւ գիտելիքին։Ժամանակակից  աշխարհը, միայն զենք-զինամթերքի մրցակցություն չէ, այլ  առաջին հերթին ինտելեկտուալ մրցակցություն է։ Եվ մենք  կունենանք պայծառ ապագա, եթե այսօրվա հերոսը լինի կրթված, ինտելեկտուալ  երիտասարդը։ Այդ առումով, կարծում եմ, մենք դեռեւս  անելիքներ ունենք»:

Այնուհետեւ վարչապետ Տիգրան Սարգսյանը Հայաստանի  երիտասարդական հիմնադրամի եւ «25 ակումբ» միջազգային կազմակերպություն  նախաձեռնած «Կամավոր, անվարձահատույց արյունատվության քարոզչություն» ակցիայի շրջանակում արդեն երրորդ անգամ արյուն  է հանձնել։