Լոռու մարզի Արմանիսի ոսկի-բազմամետաղային հանքավայրն արդեն մեկ ու կես տարի է` չի գործում, բայց չի դադարում աղտոտել շրջակա միջավայրը, հաղորդում է «ԷկոԼուրը»: 

Ստեփանավան քաղաքից 7.5 կմ հեռավորության վրա գտնվող այս հանքավայրը 2011 թվականին սկսեց շահագործել «Գլոբալ Մեթալզ (ԱՐՄ) Լիմիթեդ» ընկրությունը՝ ի դեմս «Սագամար» ՓԲԸ-ի: 2015թ-ին ընկերությունը բնապահպանական փորձաքննությանը ներկայացրեց Արմանիսի հանքի ընդլայնման ծրագիրը, ստացավ դրական եզրակացություն ու ինչ-ինչ պատճառներով դադարեցրեց հանքի շահագործումը՝ իր հետեւից թողնելով թափոնների մի լեռ անմիջապես ճանապարհի վրա, որը կապում է հանքավայրը Ստեփանավան քաղաքին:

Ըստ Արմանիսի հանքավայրի ընդլայնման ծրագրի՝ հանքը պետք է շահագործվեր բաց եղանակով 7 տարի, եւ փակ եղանակով 26.6 տարի: Շահագործումից հետո, որպես բաց հանքի ֆիզիկական փակում, նախագծով նախատեսվել է բացահանքի եզրագծից 20-25մ հեռավորության վրա՝ վտանգավոր վայրերում, նախազգուշացնող նշանների, իսկ ամբողջ եզրագծով արգելապատնեշների տեղադրում: Արգելապատնեշ պետք է տեղադրվեր նաեւ բացահանքը սպասարկող ավտոճանապարհի վրա: Ստորգետնյա հանքի փակման ընթացքում բովանցքերի մուտքերը պետք է փակեին մետաղյա դռներով: Իսկ 83.4 հա մակերես զբաղեցնող լցակույտերը բացհանքի շահագործումը ավարտելուց հետո պետք է ծածկվեին 157.46 հազար մ3 ծավալով հողաբուսական շերտով:

«ԷկոԼուր»-ն այցելեց Արմանիսի հանքավայրի տարածք եւ առաջին անգամ իրականացրեց նկարահանում անօդաչու թռչող սարքով: Ակնհայտորեն երեւում է, որ որեւէ վերականգնման աշխատանք այդ տարածքում չի իրականացվել: Տեղումների հետ թունավոր թափոններից աղտոտվածությունը տարածվում է մոտակա հողերում, որտեղ հենց նկարահանման պահին գյուղացիներն արածեցնում էին իրենց անասուններին:

Արմանիսի հանքաքարում առկա է՝ ոսկի` 11350կգ, 0.84 գ/տ, արծաթ` 149998.4կգ, 11.1 գ/տ, պղինձ`145930.8 տոննա, ցինկ` 289456.7տոննա, կապար՝ 168901.4 տոննա: