նախընտրելի դարձնել
Նոյեմբերի 3-ին Իրաքում Հայաստանի դեսպան Մուրադ Մուրադյանն իր հավատարմագրերի պատճենն է հանձնել Իրաքի արտաքին գործերի նախարար Հոշիար Զեբարիին: Իրաքում Հայաստանը վերջերս է դեսպանատուն բացել:
ԱԳՆ մամուլի ծառայությունից NEWS.am-ին հայտնում են, որ պաշտոնական արարողությունից հետո տեղի է ունեցել առանձնազրույց:
Նախարար Զեբարին, շնորհավորելով դեսպանին, ողջունել է Իրաքում դեսպանություն բացելու մասին Հայաստանի որոշումը: Նա ասել է, որ Իրաքն իր կողմից քայլեր կձեռնարկի Հայաստանում մոտ ապագայում դեսպանություն բացելու ուղղությամբ:
Հանդիպման ընթացքում քննարկվել են երկկողմ հարաբերություններին առնչվող խնդիրներ: Երկուստեք կարեւորվել է իրավապայմանագրային դաշտի ստեղծման անհրաժեշտությունը, ինչը հնարավորություններ կստեղծի ավելի արդյունավետ համագործակցել եւ ընդլայնել հարաբերությունները առեւտրատնտեսական, մշակութային, հումանիտար ոլորտներում:
Զրույցի ավարտին նախարար Զեբարին հույս է հայտնել, որ Հայաստանի դեսպանն իր կարեւոր ներդրումը կունենա հայ-իրաքյան բարեկամական հարաբերությունների առավել ամրապնդման գործում եւ արտգործնախարարության աջակցություն է հայտնել դեսպանին առաքելության իրականացման ընթացքում:
