նախընտրելի դարձնել
Հայաստանի արտաքին գործերի նախարարությունը մշտական կապի մեջ է Եվրամիությունից իր գործընկերների հետ` Արցախի անկախության ճանաչման, Արցախի ժողովրդի ինքնորոշման իրավունքի ճանաչման եւ այլ հարցերով: Այս մասին Հայաստանի Ազգային ժողովում ֆինանսավարկային եւ բյուջետային հարցերի, ինչպես նաեւ եվրոպական ինտեգրման հարցերի մշտական խորհրդարանական հանձնաժողովների համատեղ նիստին 2021 թվականի բյուջեի նախագծի քննարկման ժամանակ ասաց ՀՀ փոխարտգործնախարար Ավետ Ադոնցը:
Ըստ նրա` հանրապետության արտաքին գործերի նախարարությունն ամենօրյա կապի մեջ է իր եվրոպացի գործընկերների հետ եւ աշխատում է մի քանի ուղղություններով` Արցախի անկախության ճանաչումից մինչեւ Արցախի ժողովրդի ինքնորոշման իրավունքը: «Մնացած հարցերը վերաբերում են պատժամիջոցներին, մարդասիրական օգնությանը, որը պետք է շատ հասցեական լինի` ուղղված մեր տեղահանված հայրենակիցներին, որոնց թիվը բավականին մեծ է»,- ասաց Ադոնցը:
Փոխնախարարը նաեւ նշեց, որ եվրոպական շատ քաղաքներ ճանաչում են Արցախի անկախությունը, ինչը շատ կարեւոր քայլ է այս հարցի հետագա զարգացումն ապահովելու համար: Այնպես որ, նրա խոսքով, պետությունները, ըստ էության, ճանաչում են Արցախի անկախությունը տեղական ինքնակառավարման մակարդակում: «Մենք դա շատ կարեւոր քայլ ենք համարում հետագա զարգացման ապահովման համար: Կան նաեւ նախնական պայմանավորվածություններ եւ բավականին լուրջ քննարկումներ ավելի որակյալ ակտերի իրականացման վերաբերյալ»,- շեշտեց Ադոնցը:
