նախընտրելի դարձնելՎարչապետ Նիկոլ Փաշինյանի հրաժարականի պահանջով փողոցները փակելու ակցիաներին միացել է նաեւ ԱԺ նախկին պատգամավոր Գագիկ Մինասյանը։ Նա լրագրողների հետ զրույցում համոզմունք հայտնեց, որ այս իշխանությունների մեկ օր մնալն էլ ավելի ծանր խնդիրներ է ստեղծելու առաջիկայում։
«Իրավիճակ է ստեղծվել, որ բոլորը հասկանում են, որ մինչեւ դեկտեմբերի 1-ը Նիկոլ Փաշինյանը պետք է օտար երկրներին, որպեսզի նա կարողանա այդ ստորացուցիչ պայմանները մինչեւ վերջ տանի, բայց դրանից հետո նրա մնալը անտրամաբանական է եւ այսօր ժողովուրդը պետք է դուրս գա, որովհետեւ ակնհայտ է, որ Նիկոլ Փաշինյանը իր կամքով չի հեռանալու»,- նշեց Գագիկ Մինասյանը։
Դեկտեմբերի 1-ից հետո, ըստ նրա՝ ժամացույցն աշխատելու է ոչ միայն ի վնաս Նիկոլ Փաշինյանի, այլեւ ժողովրդի, այդ իսկ պատճառով էլ պետք է ազատվել «այս ապիկար, անգրագետ ու կործանարար իշխանություններից»։
Թե ինչպե՞ս է դա պատկերացնում առանց ցնցումների, Գագիկ Մինասյանն ընդգծեց, որ հենց իշխանություններն են պատասխանատու դրա համար։
Դիտարկմանը, թե վարչապետը հեռանալու մտադրություն չունի, այսօր էլ Կառավարության կազմում փոփոխություններ է արել, նաեւ ներկայացրել ճանապարհային քարտեզ, Գագիկ Մինասյանն ասաց, որ զարմանալի չէ, որ այն մարդը, որը պատասխանատվության զգացում չունի, ինքը չի հասկանում, թե ինչ ծանր բեռ է վերցնում իր ուսերին։
«Ուղղակի ժողովուրդը պետք է համախմբվի եւ պարտադրի, որ այս իշխանությունն օր առաջ հեռանա»,- նշեց նա։
Հիշեցնենք, որ արդեն երկրորդ օրն է՝ Նիկոլ Փաշինյանի հրաժարականը պահանջող քաղաքացիները Երևանի տարբեր վարչական շրջաններում փակում են փողոցները, ինչի ընթացքում տասնյակ ցուցարարներ բերման են ենթարկվել։ Այսօր նմանատիպ ակցիաներ տեղի են ունեցել նաև Գյումրիում։
