Հայաստանի վարչապետ Նիկոլ Փաշինյանը եւ ՌԴ նախագահ Վլադիմիր Պուտինը, Ռուսաստանի եւ Հայաստանի միջեւ դաշնակցային հարաբերություններին բնորոշ կառուցողական եւ վստահության մթնոլորտում հանգամանորեն մտքեր են փոխանակել երկկողմ համագործակցության լայն օրակարգի շուրջ։

Երկու առաջնորդների համատեղ հայտարարության համաձայն՝ Պուտինը եւ Փաշինյանը «հանգամանորեն մտքեր են փոխանակել քաղաքական, ռազմական եւ ռազմատեխնիկական, առեւտրատնտեսական, գիտակրթական, մշակութային-հումանիտար ոլորտներում, ինչպես նաեւ արդարադատության, աշխատանքի եւ սոցիալական հարցերի ոլորտներում երկկողմ համագործակցության լայն օրակարգի շուրջ, գոհունակությամբ նշել են Ռուսաստանի եւ Հայաստանի միջեւ բազմաբնույթ, փոխշահավետ դաշինքի զարգացման դրական դինամիկան»։

Քննարկվել են նաեւ փոխադարձ հետաքրքրություն ներկայացնող տարածաշրջանային եւ միջազգային հարցերի շուրջ փոխգործակցության արդիական հարցեր։

«Կողմերը, պատմական նշանակություն տալով 1992 թվականի ապրիլի 3-ին պետությունների միջեւ դիվանագիտական հարաբերությունների հաստատման 30-ամյակին, վերահաստատեցին բարեկամության, համագործակցության եւ փոխօգնության պայմանագրով ամրագրված սկզբունքների հիման վրա միջպետական հարաբերությունները համակողմանիորեն խորացնելու եւ ընդլայնելու իրենց մտադրությունը։ Ռուսաստանի Դաշնության եւ Հայաստանի Հանրապետության միջեւ 1997 թվականի օգոստոսի 29-ին եւ Ռուսաստանի Դաշնության եւ Հայաստանի Հանրապետության միջեւ դաշնակցային փոխգործակցության մասին 2000 թվականի սեպտեմբերի 26-ի հռչակագիրը, ուղղված դեպի 21-րդ դարը: Համոզմունք հայտնեցին, որ ռուս-հայկական հարաբերությունների հետագա առաջանցիկ զարգացումը կնպաստի Ռուսաստանի եւ Հայաստանի ժողովուրդների հիմնարար շահերի եւ ձգտումների իրականացմանը, տարածաշրջանային անվտանգության եւ կայունության ամրապնդմանը, ինչպես նաեւ երկու երկրների միջազգային հեղինակության ամրապնդմանը»:

Պուտինը եւ Փաշինյանը նշել են վստահության բարձր մակարդակի կանոնավոր երկխոսության կարեւորությունը։ Այս առումով ընդգծվել է Հայաստանի վարչապետի Ռուսաստանի Դաշնություն կատարած պաշտոնական այցի արդիականությունն ու նշանակությունը՝ փոխշահավետ քաղաքական շփումների հետագա ամրապնդման, միջգերատեսչական փոխանակումների ընդլայնման, եվրասիական տարածքում առեւտրատնտեսական համագործակցության եւ ինտեգրացիոն գործընթացների խորացման, Հարավային Կովկասում իրավիճակը կարգավորելու եւ կայունությունը բարձրացնելու համար։ «Հաստատվեց տարբեր մակարդակներում երկկողմ արտաքին քաղաքական խորհրդակցությունների պրակտիկայի օգտակարությունը։ Ընդգծվեց ռուս-հայկական միջխորհրդարանական ինտենսիվ երկխոսությունը շարունակելու անհրաժեշտությունը։ Նշվեց Ռուսաստանի Դաշնության եւ Հայաստանի Հանրապետության միջեւ ռազմական եւ ռազմատեխնիկական համագործակցության բարձր մակարդակը»։

Ղեկավարները գոհունակություն են հայտնել Ռուսաստանի եւ Հայաստանի միջեւ առեւտրաշրջանառությունը կայուն աճի ուղու վրա դնելու աշխատանքների արդյունքներից։ Ընդգծվել է ապրանքաշրջանառության ծավալների եւ դիվերսիֆիկացման հետագա առաջանցիկ աճի, արտադրության տարբեր ոլորտներում համագործակցության զարգացման, Եվրասիական տնտեսական միության մեխանիզմների ակտիվ ներգրավման անհրաժեշտությունը։

Պայմանավորվածություն է ձեռք բերվել խրախուսել երկու երկրների գործարար շրջանակների միջեւ սերտ կապերի հաստատումը, այդ թվում միջտարածաշրջանային եւ մունիցիպալ ձեւաչափերով՝ օգտագործելով բիզնես առաքելությունների մեխանիզմը։ Դրական են գնահատվել Ռուսաստանի Դաշնության կառավարության եւ Հայաստանի Հանրապետության կառավարության միջեւ 2022-2025 թվականների տնտեսական համագործակցության ծրագրի ավարտի աշխատանքները։

Նշվել է Ռուսաստանի Դաշնության եւ Հայաստանի Հանրապետության միջեւ տնտեսական համագործակցության միջկառավարական հանձնաժողովի, ինչպես նաեւ արդյունաբերության աշխատանքային խմբի բարձր պահանջարկն ու արդյունավետությունը գործնական երկկողմ համաձայնագրերի մշակման եւ իրականացման համար: Փոխադարձ հետաքրքրություն է արտահայտվել Հայաստանում արդյունաբերական ցուցահանդեսների պարբերաբար անցկացման հարցում, այդ թվում՝ բարձր տեխնոլոգիաների ոլորտում համագործակցության շեշտադրմամբ։

Կողմերը ողջունել են Հայաստանում ամբողջական եւ ժամանակակից արտադրական ցիկլեր ստեղծելու ռուսաստանյան տնտեսվարողների մտադրությունը։ Նրանք հետաքրքրություն են հայտնել էներգետիկայի զարգացման, այդ թվում՝ վերականգնվող էներգետիկայի, էներգետիկ անվտանգության եւ անկախության, բնության հանդեպ խնամքով վերաբերմունքի եւ կայուն զարգացման սկզբունքների վրա հիմնված էներգետիկայի զարգացման ծրագրերի մշակման հարցում։

Որոշվել է էլ ավելի հեշտացնել ռուսական ներդրումների հոսքը Հայաստան։ Ընդգծվել է, որ Ռուսաստանից եկած տնտեսվարողները Հայաստանի Հանրապետության առանցքային հարկատուներից են, ապահովում են զգալի թվով աշխատատեղերի ստեղծումը եւ ընդլայնում մասնագիտական վերապատրաստման հնարավորությունները։

Գոհունակությամբ արձանագրել են Կողմերի աշխատանքը ռուս-հայկական գործարար խորհրդի ստեղծման ուղղությամբ՝ երկու երկրների տարածաշրջանների միջեւ կապերի ընդլայնման, գործարար կապերի ամրապնդման, համատեղ ձեռնարկությունների ստեղծման եւ ներդրումային երկխոսության ակտիվացման նպատակով։

Կողմերը հաստատել են ատոմային էներգիայի խաղաղ օգտագործման ոլորտում համագործակցության ամրապնդման պատրաստակամությունը։ Ողջունել են Հայկական ԱԷԿ-ի շահագործման ժամկետի երկարաձգումը եւ նոր էներգաբլոկների կառուցման տրամադրվածություն հայտնել։

Նշվել է Եվրասիական տնտեսական միության շրջանակներում էներգառեսուրսների ընդհանուր շուկաների հետեւողական ձեւավորման ուղղությամբ համատեղ արդյունավետ աշխատանքը։ Կողմերը մտադրություն են հայտնել նպաստել Ռուսաստանի եւ Հայաստանի մարզերի միջեւ գործնական փոխգործակցության խորացմանը, այդ թվում՝ ամենամյա միջտարածաշրջանային համաժողովների մեխանիզմի կիրառմամբ։ Նշել են աջակցությունը Ռուսաստանի Դաշնության կառավարության եւ Հայաստանի Հանրապետության կառավարության միջեւ 2022-2027 թվականների համար միջտարածաշրջանային համագործակցության ծրագրի համակողմանի իրականացմանը, մարզերի եւ քաղաքապետարանների միջեւ խաչաձեւ կապերի հաստատմանը։