նախընտրելի դարձնելՈրոշ բուժհաստատությունների ղեկավարներ հստակ պատկերացում չունեն զարգացման ուղիների վերաբերյալ եւ չի բացառվում, որ նրանք առաջիկայում իրենց տեղը զիջեն ավելի հմուտ կառավարիչների: Այս մասին այսօր` օգոստոսի 12-ին հայտարարել է Երեւանի քաղաքապետ Կարեն Կարապետյանը` քաղաքապետարանի ենթակայությամբ գործող առողջապահական հիմնարկների ղեկավարների հետ հանդիպման ժամանակ:
Քաղաքապետարանի մամուլի ծառայությունից NEWS.am-ին հայտնում են, որ դեռեւս տարեսկզբին քաղաքապետը առողջապահական ոլորտի պատասխանատուներին հանձնարարել էր ծրագրային առաջարկություններ ներկայացնել՝ ներառելով ֆինանսատնտեսական գործունեության բարելավման վերաբերյալ կանխատեսումների հաշվարկները, ինչպես նաեւ մասնավոր ներդրողների հետ համագործակցության հնարավոր տարբերակները:
Կառավարման նոր մեխանիզների ներդրումը նպատակ ունի բարելավել բուժսպասարկման ոլորտի երթակառուցվածքները, նորագույն բուժսարքավորումների վերազինում ապահովել եւ էականորեն բարձրացնել բնակչության բուժսպասարկման որակը:
Ծանոթանալով անցած ամիսներին կատարված աշխատանքներին եւ ոլորտում առկա հիմնախնդիրներին՝ քաղաքապետը նշել է, որ ներկայացված ծրագրային պատկերացումները դեռեւս հեռու են զարգացման արդյունքներ ակնկալելուց: Քաղաքապետի խոսքով, ծրագրերը պետք է ունենան իրական տեսլական, գործողությունների հստակ ժամանակացույց եւ ճկուն մեխանիզմներ՝ բուժծառայությունների ժամանակակից պահանջները բավարարելու համար:
Կարեն Կարապետյանը մեկ անգամ եւս ընդգծել է, որ փոխշահավետ ծրագրերի միջոցով հնարավոր է լուրջ ներդրումներ ներգրավել առողջապահության ոլորտի զարգացման գործում. «Բժշկությունն ամբողջ աշխարհում բիզնես բաղադրիչ ունի, դուք բացի այդ բաղադրիչից ունեք պետական ծառայություն կատարելու պարտավորություններ: Սպասենք, թե երբ է բյուջեն հարստանալու, որ մեր պատակերացումները բավարարվի՞, անհեռանկարային ճանապարհ է», - նշել է Կարեն Կարապետյանը:
Նա առաջարկել է համաբուժարանների եւ մյուս բուժհաստատությունների աշխատանքի վարկանշային սանդղակ կազմել եւ համապատասխանաբար գնահատական տալ կատարված աշխատանքին:
