նախընտրելի դարձնել
Շատ մարդիկ, ովքեր պատրաստվում են ստարտափ սկսել, առաջին հերթին իրենց ընկերներին ու ծանոթներին հարցնում են, թե արդյոք նրանք կգնեն իրենց արտադրանքը։ Հետագա գործողությունները սովորաբար կախված են ստացված պատասխաններից: TCF-ի տնօրեն եւ համահիմնադիր Նարեկ Վարդանյանը կարծում է, որ այս մոտեցումը սկզբունքորեն սխալ է:
NEWS.am-ի թղթակցի հետ զրույցում մասնագետը նշել է, որ ընկերներն ու հարազատները վատ խորհրդատուներ են, եւ նրանց՝ թե՛ դրական, թե՛ բացասական կարծիքը, չի կարող բավարար հիմք լինել որեւէ բիզնես սկսելու կամ չսկսելու համար։
Չի ցանկանում վիրավորել/ պատրաստ չէ գնել
Եթե ձեր ընկերներին եւ ընտանիքին պատմեք ձեր գաղափարի մասին, նրանցից ոմանք հավանաբար կասեն, որ չեն գնի ձեր ապրանքը: Նրանք իսկապես կարող են անկեղծ լինել իրենց կարծիքն արտահայտելիս, սակայն դա չի նշանակում, որ ձեր գաղափարն իսկապես վատն է։ Միգուցե ձեր ընկերները պարզապես ձեր թիրախային լսարանը չեն: Կամ էլ սխալ էին պատկերացնում ձեր ապրանքը, բայց եթե իրականում տեսնեին, հաճույքով կգնեին։
Մյուս ծանոթներն ու հարազատները կարող են ձեզ ասել, որ դուք հիանալի գաղափար ունեք, եւ որ դուք շտապ պետք է սկսեք այն իրականացնել։ Իրականում ձեր գաղափարը կարող է սարսափելի լինել, նրանք պարզապես չեն ցանկանում վիրավորել ձեզ եւ փորձում են աջակցել: Ավաղ, նման աջակցությունը ձեր արտադրանքին իրական պահանջարկ, իհարկե, չի բերի:
Այդ դեպքում ինչպե՞ս հասկանալ, թե որքանով է ձեր գաղափարը խոստումնալից եւ արժե՞ արդյոք աշխատել դրա իրականացման ուղղությամբ:
Ճիշտ հարցեր ճիշտ մարդկանց համար
Ինչպես նշեց Նարեկ Վարդանյանը, ծանոթներին եւ ընկերներին հարցնելու փոխարեն՝ արդյոք կգնեն ձեր ապրանքը, դուք պետք է կենտրոնանաք ձեր թիրախային լսարանի մարդկանց իրական պահվածքի վրա։ Դուք պետք է հասկանաք, թե արդյոք ձեր պոտենցիալ հաճախորդները հետաքրքրված են ձեր արտադրանքով այնքան, որ պատրաստ լինեն վճարել դրա համար:
Իսկ դրա համար, ըստ փորձագետի, պետք է ճիշտ հարցեր տալ ճիշտ մարդկանց։
«Եթե ձեր արտադրանքը լուծում է խնդիր, դուք պետք է հասկանաք, թե ինչպիսի մարդիկ են բախվում այս խնդրին եւ նրանց ճիշտ հարցեր ուղղեք: Ի՞նչ են նրանք արդեն փորձել անել այս խնդիրը լուծելու համար։ Փնտրե՞լ են արդյոք ապրանք, որն օգնում է լուծել այս խնդիրը: Գտե՞լ են, թե ոչ։ Որքա՞ն են վճարել։ Պետք չէ հարցնել, թե որքան են նրանք պատրաստ վճարել, այլ պետք է հարցնել, թե որքան են նրանք արդեն վճարել նման բանի համար: Կարեւոր է հասկանալ, թե արդյոք մարդիկ արդեն ինչ-որ բան արել են խնդրի լուծման համար, որը ձեր արտադրանքը կարող է լուծել: Նման հարցերը ձեզ ավելի հստակ պատկերացում կտան, թե արդյոք այդ անձը ձեր պոտենցիալ հաճախորդն է: Դուք կհասկանաք, թե որքան մեծ է ձեր արտադրանքի պահանջարկը. արդյո՞ք դրա լուծումը իսկապես այնքան լուրջ խնդիր է, որ պոտենցիալ հաճախորդներն արդեն փորձել են ինչ-որ կերպ լուծել այն: Այս ամբողջ տեղեկատվությունը կօգնի ձեզ հասկանալ՝ արժե՞ արդյոք աշխատել ձեր արտադրանքի վրա, թե այն ոչ ոքի պետք չէ»,- բացատրեց մասնագետը:
Նվազագույն կենսունակ արտադրանք
Նարեկ Վարդանյանը լավ գաղափար է համարում ձեր արտադրանքի նախատիպը ստեղծելը, որը կարող է ցուցադրվել թիրախային լսարանին։
«Երբ մարդկանց ուղղակի պատմում ես քո գաղափարի մասին, յուրաքանչյուրը կարող է դա հասկանալ յուրովի: Եվ հետո դու արտադրանք ես պատրաստում ու ցույց տալիս այս մարդկանց, եւ պարզվում է, որ դա բոլորովին այն չէ, ինչ նրանք պատկերացնում էին։ Իրականում գաղափարները մեծ արժեք չունեն։ Մարդիկ կարծում են, որ փայլուն գաղափարներ ունեն, բայց եթե լավ փնտրես, կստացվի, որ ինչ-որ մեկի գլխում արդեն նման փայլուն միտք ծագել է, ինչ-որ մեկն արդեն իրականացրել է։ Այսօր աշխարհում փայլուն գաղափարների պակաս հաստատ չկա, սակայն այդ գաղափարների փայլուն իրականացման պակաս կա։ Հետեւաբար, եթե դուք լավ գաղափար ունեք, դա ոչինչ չի նշանակում։ Դուք պետք է ձեր գաղափարը ձեւակերպեք, ստեղծեք նախատիպ՝ լինի դա ֆիզիկական արտադրանք, թե առցանց, եւ միայն դրանից հետո պարզ կդառնա, թե որքանով է այս գաղափարն իսկապես արժեքավոր, եւ արդյոք կա դրա պահանջարկը», - ասաց Վարդանյանը:
Միեւնույն ժամանակ, ըստ փորձագետի, շատ ավելի ճիշտ է նախատիպն արագ ստեղծելն ու այն պոտենցիալ հաճախորդներին ցույց տալը, քան տարիներ շարունակ նստել եւ մշակել լիարժեք, «իդեալական» արտադրանք։
«Դուք կարող եք զարգացման վրա մի քանի տարի ծախսել՝ ձեր ապրանքը հասցնելով իդեալականին, այնուհետեւ այն բերել շուկա եւ պարզվի, որ դա այլեւս ոչ մեկին պետք չէ, քանի որ տարիների ընթացքում շուկայում հայտնվել են նմանատիպ այլ ապրանքներ, կամ ի սկզբանե մեծ հետաքրքրություն չէր ներկայացնում պոտենցիալ հաճախորդների համար», - նշեց մասնագետը:
Ըստ Վարդանյանի՝ նման խնդիրներից խուսափելու համար ցանկալի է ստեղծել նախատիպ՝ այսպես կոչված, նվազագույն կենսունակ արտադրանք (Minimum viable product), որը կարող է նվազագույնի հասցնել այն խնդիրը, որը պետք է լուծի ձեր արտադրանքը, եւ օգնել պոտենցիալ հաճախորդին՝ ստեղծել դրա մասին առաջին տպավորությունը: Նման արտադրանքի օգնությամբ դուք կստանաք արձագանքներ եւ կհասկանաք, թե ինչ հեռանկարներ կան այս ապրանքի հետագա զարգացման համար:
Նշենք, որ Նարեկ Վարդանյանը TechWeek 2022-ի բանախոսներից է, որն անցկացվել է Գյումրի քաղաքում եւ դարձել ՏՏ ոլորտի խոշորագույն միջոցառումներից մեկը։ Իր ելույթի ընթացքում նա պատմեց, թե ինչ հարցեր ՉԻ կարելի տալ ստարտափ ստեղծելիս, եւ ինչ հարցեր կարելի է եւ նույնիսկ պետք է տալ։
