նախընտրելի դարձնել
Ավստրալիայի պաշտպանության նախարար Ռիչարդ Մարլզը տեղեկացրել է, որ կաշխատի խորացնել պաշտպանական կապերը Ֆրանսիայի, Գերմանիայի եւ Մեծ Բրիտանիայի հետ՝ այս շաբաթ կայանալիք հանդիպումների ընթացքում, եւ նշել, որ Ուկրաինայում ընթացող պատերազմը մեծացրել է համախոհների հետ աշխատելու կարեւորությունը, հայտնում է Reuters լրատվական գործակալությունը:
Մայիսին կայացած ընտրություններից հետո Ավստրալիայի ձախ կենտրոնամետ Լեյբորիստական կուսակցության իշխանության գալուց հետո նախարարն առաջին անգամ այցով կլինի Եվրոպայում օգոստոսի 29-ից մինչեւ սեպտեմբերի 1-ը:
Ուղեւորության ընթացքում նախարարը կհանդիպի գործընկերների հետ, ինչը, ըստ կառավարության, հնարավորություն է եվրոպական պաշտպանական կապերի ամրապնդմանն Ավստրալիայի նվիրվածությունը ցույց տալու համար:
Կառավարությունը նշել է, որ Ֆրանսիա կատարած այցը կօգնի «վերակառուցել եւ թարմացնել» նրանց երկկողմ հարաբերությունները եւ Ֆրանսիան անվանել Ավստրալիայի ամենահին եւ ամենակարող գործընկերներից մեկը: Անցյալ տարի ֆրանսիական սուզանավերի մատակարարման մի քանի միլիարդ դոլար արժողությամբ գործարքից դուրս գալու որոշում ընդունելուց հետո՝ հունիսին Ավստրալիան 555 միլիոն եվրոյի գործարք է կնքել ֆրանսիական Naval Group ռազմական նավաշինական գործարանի հետ:
Կանբերան հուսով էր, որ համաձայնագիրը կօգնի լրացնել երկրների միջեւ առկա բացը այն բանից հետո, երբ գործարքը չեղարկվել էր՝ հօգուտ ԱՄՆ-ի եւ Մեծ Բրիտանիայի հետ համաձայնագրի (AUKUS): Այս շաբաթ կայանալիք իր ուղեւորության ընթացքում Մարլսը կմասնակցի Գերմանիայում պաշտպանական արդյունաբերության ներկայացուցիչների հետ կլոր սեղանին, իսկ Մեծ Բրիտանիայում նա կայցելի նավաշինական գործարաններ:
«Մեր հարաբերությունները Մեծ Բրիտանիայի հետ պատմական են եւ փոխշահավետ, ինչը արտացոլված է AUKUS ծրագրին մեր շարունակական նվիրվածության մեջ: Իմ այցը Եվրոպա տեղի է ունենում այն ժամանակ, երբ Ուկրաինայի պատերազմը ցույց տվեց համախոհների հետ համագործակցության ընդլայնման կարեւորությունը ինչպես Եվրոպայում, այնպես էլ Հնդկ-Խաղաղօվկիանոսյան տարածաշրջանում», - ասվում է Մարլզի տարածած հայտարարության մեջ:
Ուղեւորությունը ծրագրվել է Մարլզի Ճապոնիա այցից հետո, որը նպատակ է ունեցել խթանել երկկողմ պաշտպանական համագործակցությունը՝ փորձելով հակակշռել Չինաստանի աճող ռազմական ազդեցությունն Ասիայում:
