նախընտրելի դարձնել
Ռուսաստանի նախագահի մամուլի քարտուղար Դմիտրի Պեսկովը հայտարարել է, որ «հացահատիկի գործարքը» «վտանգավոր բնույթ» է ստացել Ուկրաինայի գործողությունների պատճառով։
«Այն պայմաններում, երբ Ռուսաստանը խոսում է նշված տարածքներում նավագնացության անվտանգության երաշխավորման անհնարինության մասին, իհարկե, նման գործարքը դժվար թե իրագործելի է, այն այլ բնույթ է ստանում՝ շատ ավելի ռիսկային, վտանգավոր եւ չերաշխավորված», - ասել է Կրեմլի ներկայացուցիչը՝ մեկնաբանելով Ուկրաինայի կողմից վերջին գործողությունները (Սեւաստոպոլի վրա հարձակումը)։
Նրա խոսքով՝ Կիեւի վարքագիծը հանգեցրել է գործարքի ձախողմանը, վստահության խաթարմանը։
«Այստեղ պետք է հասկանալ, որ դա ուկրաինական կողմի գործողությունն է։ Նրանք են հանգեցրել նրան, որ գործարքը վտանգված լինի»,- ասել է Կրեմլի ներկայացուցիչը՝ նշելով, որ Մոսկվան շարունակում է դիվանագիտական ներկայացուցչությունների միջոցով շփումները Թուրքիայի եւ ՄԱԿ-ի հետ այդ հարցի շուրջ։
Ավելի վաղ Թուրքիայի նախագահ Ռեջեփ Թայիփ Էրդողանը հայտարարել էր, որ Անկարան կշարունակի կատարել «հացահատիկի գործարքի» պայմանները՝ չնայած Ռուսաստանի վարանումներին։
