նախընտրելի դարձնելՈչ Ռուսաստանը, ոչ Արևմուտքը ոչինչ չեն անում Լաչինի միջանցքը ապաշրջափակելու համար. Այս մասին NEWS.am -ի թղթակցի հետ զրույցում ասել է քաղաքագետ Արթուր Խաչիկյանը։
«Ռուսաստանը պետք է ճնշում գործադրի Ալիևի վրա Լաչինի միջանցքը բացելու համար։ Նոյեմբերի 9-ի հայտարարություն կա, և Ռուսաստանն անընդհատ շեշտում է, որ հենց դա պետք է հիմք հանդիսանա։ Եթե այդպես է, ապա այս հայտարարության դրույթները պետք է հարգվեն: Նրանք պետք է կատարեն իրենց պարտավորությունները։
Արևմուտքն, իր հերթին, նույնպես պատժամիջոցներ չի սահմանում։ Ամեն ինչ որոշվում է շահերով ու ուժով, միջազգային արժեքներ չկան»,- ասել է նա։
Ըստ նրա, միջազգային հանրությանը Հայաստանը պետք չէ, քանի որ այն ոչ մի հետաքրքրություն չի ներկայացնում։
«Սա Հայաստանի իշխանությունների արևմտամետ և հակառուսական քաղաքականության արդյունքն է, որոնք հասցրեցին նրան, որ նոյեմբերի 9-ի հայտարարության դրույթները կորցրին իրենց ուժը՝ փոխարենը ոչինչ չստանալով, ինչպես նաև Արցախը ճանաչեցին որպես Ադրբեջանի մաս»,- ավելացրել է Խաչիկյանը։
Նա հիշեցրել է, որ Ռուսաստանը երկար ժամանակ հորդորում էր չշտապել և խաղաղության պայմանագիր չստորագրել արևմտյան հարթակներում։
«Ռուսները միշտ նշել են, որ իրենք են դադարեցրել 2020 թվականի պատերազմը, որ պայմանագիրը պետք է ստորագրվի իրենց միջնորդությամբ։ Իսկ հետո Պուտինը ակնարկեց, որ եթե համաձայնություն չլինի, և հակամարտությունը շարունակվի, ապա Ռուսաստանը դուրս կգա։
Եթե Ռուսաստանը դուրս գա Արցախից, դա կներկայացվի, թե ռուսները չեն կարող երաշխավորել մեր անվտանգությունը և պետք է հեռանան Հայաստանից։ Միևնույն ժամանակ, ռուս խաղաղապահների դուրսբերումն Արցախից կհանգեցնի հայերի ցեղասպանության։
Սա հստակ ծրագիր է, որի նպատակը Արցախի հանձնումն է, Ռուսաստանի դուրսբերումը տարածաշրջանից և Հայաստանը Թուրքիայից և Ադրբեջանից կախված երկրի վերածելը՝ նրանց ձուլվելու հեռանկարով, այսինքն՝ Հայաստան չի լինի։
Այս միացյալ թյուրքական պետությունը կմտնի ՆԱՏՕ-ի կազմի մեջ, ինչը բխում է Արևմուտքի շահերից։ Դրա համար է Մոսկվան հորդորում չշտապել, թեև ինքն էլ անթերի չի կատարում իր գործառույթները»,- ընդգծել է քաղաքագետը։
