Ադրբեջանը խուսափում է կոնկրետ քայլեր անել Հայաստանի հետ բանակցային գործընթացում: Այս մասին նոյեմբերի 17-ին` Ազգային ժողովում ավանդական ճեպազրույցների ժամանակ, հայտարարեց ընդդիմադիր դաշինքի «Պատիվ ունեմ» խորհրդարանական խմբակցության քարտուղար Տիգրան Աբրահամյանը՝ մեկնաբանելով Բաքվի՝ Վաշինգտոնում արտգործնախարարների ղեկավարների մակարդակով բանակցություններին մասնակցելուց հրաժարվելը։

Խորհրդարանականի գնահատմամբ՝ Բաքուն այժմ վերագնահատում է իր հնարավորությունները, ինչպես նաև իր ուժերի հավասարակշռությունը։

«Ակնհայտ է, որ Ադրբեջանը Հայաստանից տարածքային պահանջներ ունի։ Վերջերս ակտիվորեն խոսվում է այսպես կոչված «անկլավների» մասին։ Խոսքը 8 գյուղերի մասին է, որոնք, իբր, օկուպացվել են Հայաստանի կողմից։ Հնարավոր է՝ այս փուլում Բաքուն փորձի ժամանակ շահել և հարմար պահին ագրեսիա ձեռնարկի կոնկրետ տարածքում կամ ուղղությամբ»,- ասաց  Աբրահամյանը։

Միևնույն ժամանակ, պատգամավորն ընդգծեց, որ պետական ​​սահմանի առանձին հատվածներում հակառակորդի բանակի կազմավորումների վտանգավոր կենտրոնացումների կամ տեղաշարժերի մասին կոնկրետ տեղեկություններ չունի։

«Սա, սակայն, չի բացառում նոր ռազմական գործողությունների սպառնալիքը՝ հաշվի առնելով Բաքվից եկող ամենատարբեր ագրեսիվ և վտանգավոր հայտարարությունները»,- նշեց ընդդիմադիրը։

Ինչպես նշեց պատգամավորը, Ադրբեջանն ինքը բազմիցս ասել է. որոշ խնդիրներ լուծելիս ուժային սցենարը մնում է իր օրակարգում։

Այս մոտեցումը, նրա կարծիքով, որոշակի լարվածություն է ստեղծում։ Միաժամանակ, Ադրբեջանը տեղ-տեղ խնամքով քողարկում է իր ուժերի տեղաշարժերը։

«Ուստի, հաճախ դժվար է նկատել թշնամու այս կամ այն ​​ակտիվությունը»,- պարզաբանել է Աբրահամյանը։