ՆախընտրելիՀՀ Կոտայքի մարզի Գետամեջ գյուղ տանող ճանապարհի խնդիրը տասնամյակներ շարունակ չի լուծվում։
Պտղնի-Նոր Հաճն-Գետամեջ միջհամայնքային ճանապարհը 30 տարի առաջ սողանքների հետևանքով փլուզվել է։
NEWS.am-ի թղթակցի հետ զրույցում գյուղի բնակիչ Ալեքսան Եղիազարյանը պարզաբանել է, որ ճանապարհը տեղի բնակիչների ջանքերով լայնացվել է։
Առանց դրա, նույնիսկ միակողմանի երթևեկությունն անհնար կլիներ՝ հաշվի առնելով, որ ճանապարհը սողանքի հետևանքով խիստ նեղացել էր։
Ճանապարհով երթևեկելը վտանգավոր է նրանով, որ ավտոմեքենան կարող է հայտնվել կիրճում և հանգեցնել զոհերի: Անձրևոտ եղանակին այդ ճանապարհով երթևեկելը առանձնապես վտանգավոր է դառնում:
Խնդիրը լուծելու համար գյուղացիները մի քանի անգամ դիմել են գյուղապետարաններին ու մարզպետարաններին, ինչպես նաև Հայաստանի տարածքային կառավարման և ենթակառուցվածքների նախարարությանը։
«Խոսքը 3 մետր լայնությամբ և 105 մետր երկարությամբ ճանապարհի վերանորոգման մասին է»,- նշել է Եղիազարյանը։
Կոտայքի մարզի վարչակազմից NEWS.am-ին հայտնեցին, որ կապ են հաստատել տարածքային կառավարման և ենթակառուցվածքների նախարարության հետ՝ ապագա ծրագրերի ցանկում ճանապարհների վերանորոգումը ներառելու նպատակով։ Սակայն այս տարի ճանապարհն, ըստ ամենայնի, չի վերանորոգվի։
