Վրաստանը շահագրգռված է Հայաստանի հետ հարաբերությունների զարգացմամբ և խորացմամբ: Այս մասին Երեւանում հունվարի 30-ին ՀՀ կառավարության ղեկավար Նիկոլ Փաշինյանի հետ հանդիպումից հետո հայտարարել է Վրաստանի վարչապետ Իրակլի Կոբախիձեն։

«Այս գործընկերությունը շատ կարևոր է ողջ տարածաշրջանի համար անվտանգության, բարգավաճման և կայուն զարգացման տեսանկյունից:

Միջկառավարական հանձնաժողովի հերթական նիստի անցկացումը մեծ նշանակություն ունի ռազմավարական գործընկերության շրջանակներում ընդհանուր նպատակներին հասնելու համար։ Մեր երկրների միջև կան առանձնահատուկ հարաբերություններ, ինչը պայմանավորված է ոչ միայն աշխարհագրությամբ։ Մեր գործընկերությունը խորապես արմատավորված է երկու երկրների և ժողովուրդների միջև դարավոր պատմություն ունեցող հարաբերություններում:

Վրաստանը պատրաստ է նպաստել տարածաշրջանում խաղաղությանն ու կայունությանը, ինչը նրա բարգավաճման նախապայմանն է»,- հավելել է Վրաստանի վարչապետը։

Նա ընդգծել է միմյանց ռազմավարական շահերի, տարածքային ամբողջականության և ինքնիշխանության նկատմամբ հարգանքի կարևորությունը՝ շնորհակալություն հայտնելով հայկական կողմին Վրաստանի տարածքային ամբողջականության, անձեռնմխելիության և ինքնիշխանության օգտին արտահայտված խոսքերի համար։

«Մեր տնտեսական հարաբերությունները նույնպես կարևոր են, և մենք գոհ ենք միտումներից։ Այդ հարաբերությունները զարգացման ներուժ ունեն, և մենք քննարկել ենք այդ ներուժն օգտագործելու հնարավորությունները»,- նշել է Կոբախիձեն՝ Փաշինյանին հրավիրելով այցելել Վրաստան։