Եվրասիական միության կառավարությունների ղեկավարներն արժեթղթերի տեղաբաշխման և շրջանառության անդրսահմանային հասանելիության մասին համաձայնագիր են ստորագրել։ Փաստաթուղթը Հայաստանի անունից ստորագրել է փոխվարչապետ Մհեր Գրիգորյանը։ Ստորագրման արարողությունը տեղի է ունեցել Ալմաթիում՝ Եվրասիական միջկառավարական խորհրդի նիստի ժամանակ։

Համաձայնագրի համաձայն՝ ԵԱՏՄ երկրների ֆոնդային բորսաները պետք է հավասար պայմաններով տեղաբաշխեն իրենց և Միության մյուս չորս երկրների արժեթղթերը։ Այս կանոնը կկիրառվի նաև զուգահեռ տեղաբաշխումների դեպքում (երբ, օրինակ, հայկական ընկերությունն իր բաժնետոմսերը կամ պարտատոմսերը միաժամանակ տեղաբաշխում է Երևանի և Մոսկվայի ֆոնդային բորսաներում):

Միության երկրների ֆինանսական կարգավորիչները, անհրաժեշտության դեպքում, ստիպված կլինեն տեխնիկական աջակցություն ցուցաբերել բորսաներին։

Համաձայնագիրն ուժի մեջ կմտնի ԵԱՏՄ բոլոր հինգ երկրների խորհրդարանների կողմից վավերացնելուց հետո։