2025 թվականի հունվար-ապրիլ ամիսներին Հայաստանում ստվերային շրջանառությունը, նախորդ տարվա նույն ժամանակահատվածի համեմատ, աճել է 84 մլրդ դրամով կամ 146%-ով։ Այս մասին մայիսի 22-ին լրագրողների հետ հանդիպմանը հայտարարել է Հայաստանի պետական եկամուտների կոմիտեի նախագահ Էդուարդ Հակոբյանը։
Նա հստակեցրել է, որ դրա հետևանքով պետությունը թերհավաքագրել է 39 մլրդ դրամ, ինչը 2024 թվականի նույն ժամանակահատվածի համեմատ 80%-ով ավելի է։ Հակոբյանը հայտնել է, որ հաշվետու ժամանակահատվածում ստուգումներ են իրականացվել 6124 տնտեսվարող սուբյեկտների մոտ, մինչդեռ նախորդ տարվա նույն ժամանակահատվածում՝ 10138 տնտեսվարող սուբյեկտների մոտ։
Ըստ նրա, ստուգված սուբյեկտների թիվը կրճատվել է 40%-ով, իսկ ստուգումների արդյունքում հայտնաբերված չվճարված հարկերի ծավալն աճել է 20%-ով։ Նա պարզաբանել է, որ ստուգումների արդյունքում հայտնաբերվել է շուրջ 45 մլրդ դրամի չվճարված հարկ։
Պաշտոնյան հայտնել է, որ 2025 թվականի առաջին 4 ամիսներին անցակետերը մեկ օրում միջինը 30-ով ավելի բեռնատար են բաց թողնում, քան 2024 թվականի նույն ժամանակահատվածում, և այժմ այդ թիվը կազմում է 610 բեռնատար տրանսպորտային միջոց։
Նա նշել է, որ մաքսանենգության հայտնաբերված դեպքերի թիվն աճել է 9%-ով։ Նրա խոսքով՝ 2024 թվականի ապրիլից մինչև հունվար ժամանակահատվածում հայտնաբերվել է մաքսանենգության 112 դեպք (հիմնականում թմրանյութերի հետ կապված), մինչդեռ այս տարվա նույն ժամանակահատվածում գրանցվել է 122 դեպք։
Ինչպես նկատել է ՊԵԿ ղեկավարը, եթե 2024 թվականի հունվար-ապրիլ ամիսներին ՊԵԿ-ի դեմ կայացվել է 793 դատական ակտ, ապա 2025 թվականի նույն ժամանակահատվածում այդ թիվը նվազել է մինչև 587։ «Ընդ որում, եթե 2024 թվականի առաջին 4 ամիսներին հօգուտ ՊԵԿ-ի կայացվել է 97 դատական ակտ, ապա այժմ՝ 486։ Սա խոսում է այն մասին, որ մենք գերատեսչության ներսում արդյունավետ աշխատանք ենք տանում»,- ընդգծել է Էդուարդ Հակոբյանը։
նախընտրելի դարձնել
