ՆախընտրելիՄինսկում Եվրասիական տնտեսական ֆորումի լիագումար նիստում տեսակապի միջոցով ելույթ ունենալով՝ ՀՀ վարչապետ Նիկոլ Փաշինյանն ընդգծել է, որ նույնիսկ համեմատաբար փոքր պետությունները կարող են զգալի տեղ զբաղեցնել համաշխարհային տեղեկատվական տեխնոլոգիաների էկոհամակարգում։ Որպես ապացույց նա մեջբերել է ՝ Հայաստանում հետազոտական կենտրոն բացելու վերաբերյալ Nvidia-ի որոշումը։
Նրա խոսքով՝ երկիրը ակտիվորեն ներդրումներ է կատարում մեքենայական ուսուցման, մեծ տվյալների վերլուծության և ճանաչողական տեխնոլոգիաների ոլորտում անձնակազմի վերապատրաստման մեջ։ Պետական կառավարման նպատակային թվայնացումն ընթացքի մեջ է, բնակչության թվային գրագիտության մակարդակը բարձրանում է, և ներդրվում են կիբերանվտանգության ոլորտում ժամանակակից լուծումներ։
Փաշինյանը նշել է, որ Հայաստանում արդեն ստեղծվել է միջգերատեսչական էլեկտրոնային փոխգործակցության համակարգ, որը պետական մարմիններին հնարավորություն է տալիս առանց կրկնօրինակման մուտք գործել առաջնային տվյալների աղբյուրներ, ինչը պետական թվային ծառայությունները դարձրել է ավելի թափանցիկ և հարմար քաղաքացիների և բիզնեսի համար։
Ըստ նրա՝ հատուկ ուշադրություն է դարձվում կարգավորող շրջանակին, որը հաշվի է առնում անձնական տվյալների պաշտպանության էթիկական ասպեկտները և հարցերը։ Դա վստահություն է ներշնչում թվային միջավայրի նկատմամբ և բարելավում է մատուցվող ծառայությունների որակը։
Մշակվում են հարթակային լուծումներ, որոնք ապագայում կդառնան նորարարական ուղղությունների հիմքը։ Մասնավորապես, կանխատեսողական վերլուծության ներդրումը հնարավորություն կտա ավելի ճշգրիտ նախագծել առողջապահության, կրթության և սոցիալական քաղաքականության գործընթացները։
Նա անդրադարձել է նաև մաքսային ոլորտի թվայնացման կարևորությանը՝ ընդգծելով դրա նշանակությունը որպես վստահության տարածք։ Հայաստանի համար, որը ընդհանուր սահմաններ չունի ԵԱՏՄ մյուս երկրների հետ, մաքսային ենթակառուցվածքների արդիականացումը առանցքային նշանակություն ունի։
«Մենք բաց ենք միջսահմանային թվային հարթակների և փորձարարական լուծումների մշակման համար, որոնք թույլ կտան մեզ ոչ միայն հարմարեցնել առկա տեխնոլոգիաները, այլև ստեղծել մեր սեփականը», - ընդգծել է նա։
