Պաղեստինը ողջունում է ՄԱԿ-ի Անվտանգության խորհրդի կողմից Գազայի հատվածում հակամարտությունը կարգավորելու վերաբերյալ ԱՄՆ-ի կողմից ընդունված բանաձևը և պատրաստ է ստանձնել դրա կատարման պատասխանատվությունը, ասվում է Պաղեստինի ազգային վարչության (PNA) հայտարարության մեջ, որին հղում է անում WAFA լրատվական գործակալությունը։

«Պաղեստինի պետությունը ընդգծում է այս բանաձևի անհապաղ կիրառման անհրաժեշտությունը տեղում՝ բնականոն կյանքին վերադառնալու և Գազայի հատվածում մեր ժողովրդի պաշտպանությունն ապահովելու համար», - ասվում է հայտարարության մեջ։

Այնտեղ ընդգծվում է, որ «Պաղեստինի Պետությունը հաստատում է իր պատրաստակամությունը Գազայի հատվածում ողջ պատասխանատվությունը ստանձնելու վերաբերյալ՝ տարածքի, ժողովրդի և ինստիտուտների միասնության շրջանակներում, համարելով հատվածը Պաղեստինի Պետության անբաժանելի մասը»։

Պաղեստինյան ինքնավարությունը հայտարարել է, որ պատրաստ է համագործակցել ԱՄՆ վարչակազմի, ՄԱԿ-ի Անվտանգության խորհրդի անդամների, արաբական և իսլամական պետությունների, ԵՄ երկրների, ՄԱԿ-ի և բոլոր կողմերի հետ՝ այս բանաձևի իրականացումն ապահովելու համար։

Ինչպես հաղորդվում է, երեքշաբթի երեկոյան ՄԱԿ-ի Անվտանգության խորհուրդը հաստատել է ԱՄՆ-ի կողմից առաջարկված բանաձևի նախագիծը, որը խթանում է Գազայի հատվածում հակամարտության կարգավորման համար Վաշինգտոնի ծրագիրը։

Բանաձևը նախատեսում է Միջազգային կայունացման ուժերի ստեղծում, որոնք կհամագործակցեն Իսրայելի, Եգիպտոսի և նոր պաղեստինյան ոստիկանության հետ՝ սահմանները պաշտպանելու և Գազայի հատվածը ապառազմականացնելու համար, ինչպես նաև «Խաղաղության հարցերով խորհրդի» ձևավորում, որը մինչև 2027 թվականը կդառնա անկլավի անցումային կառավարությունը։ Ենթադրվում է, որ այն կգլխավորի ԱՄՆ նախագահ Դոնալդ Թրամփը։