Ամերիկյան կողմն աջակցություն է ցուցաբերել Մեքսիկայի հատուկ ծառայություններին այն գործողության իրականացման հարցում, որի ընթացքում ոչնչացվել է «Խալիսկոյի նոր սերունդ» (CJNG) նարկոկարտելի պարագլուխ Ռուբեն Օսեգերա Սերվանտեսը, ով հայտնի է «Էլ Մենչո» մականունով։ Այս մասին հայտնել է The Washington Post թերթը։

Ըստ պարբերականի՝ ԱՄՆ պաշտոնատար անձանց թվին պատկանող աղբյուրի՝ «գործողությունն իրականացվել է մեքսիկացի զինվորականների կողմից, սակայն ներառել է ԱՄՆ-ի և Մեքսիկայի համատեղ հատուկ խմբի մասնակցությունը»։ Կառույցը, որը ձևավորվել է Պենտագոնի կողմից 2025 թվականի հունվարին՝ նարկոկարտելների դեմ պայքարի նպատակով, տեղակայված է Արիզոնա նահանգում։ Դրա կազմում ընդգրկված են հետախուզական և իրավապահ մարմինների ներկայացուցիչներ, ինչպես նաև ԱՄՆ զինվորականներ։

Ինչպես հստակեցվում է հրապարակման մեջ, խումբը պարբերաբար համագործակցում է մեքսիկացի զինվորականների հետ։ Այն, մասնավորապես, տեղեկություններ է հավաքում ԱՄՆ-ում և Մեքսիկայում գործող նարկոկարտելների մասին։

Վաշինգտոնում Մեքսիկայի դեսպանատունն ավելի վաղ հայտարարել էր, որ այդ երկրի հատուկ ծառայություններն ինքնուրույն են մշակել և իրականացրել ուժային գործողությունը, որի ընթացքում Տալպա դե Ալյենդե մունիցիպալիտետում (Խալիսկո նահանգ) ոչնչացվել է CJNG-ի պարագլուխը։ Մեքսիկական դիվանագիտական ներկայացուցչությունից նշել են, որ ԱՄՆ իշխանությունները տրամադրել են միայն լրացուցիչ հետախուզական տեղեկատվություն։ Դեսպանատունը հերքել է այն պնդումները, թե գործողությունն իրականացվել է ամերիկյան զինվորականների կողմից։ Դիվանագիտական առաքելությունից հավելել են, որ Մեքսիկայի Ազգային գվարդիայի և բանակի զինծառայողներն ուժեղացնում են անվտանգության միջոցառումները Խալիսկոյում և հարևան նահանգներում՝ հանցավոր խմբավորումների հնարավոր արձագանքի հետ կապված հասարակական կարգը պահպանելու համար։

Մեքսիկայի ազգային պաշտպանության նախարարությունն ավելի վաղ հայտնել էր նարկոկարտելի պարագլխի ոչնչացման մասին։ Գերատեսչության տվյալներով՝ հանցագործը ծանր վիրավորում է ստացել ուժայինների հետ զինված բախման ժամանակ և մահացել է օդային ճանապարհով Մեխիկոյի զինվորական հոսպիտալ տեղափոխվելու ընթացքում։