Ռուսաստանի նախագահ Վլադիմիր Պուտինը և Իրանի Իսլամական Հանրապետության նախագահ Մասուդ Փեզեշքիանը հեռախոսազրույցի ընթացքում քննարկել են Մերձավոր Արևելքում իրավիճակի վերջին զարգացումները։ Այս մասին հայտնում է Կրեմլը։

Իրանի նախագահը ներկայացրել է ապրիլի 11-ին Իսլամաբադում կայացած իրանա-ամերիկյան բանակցությունների վերաբերյալ իր գնահատականը, երախտագիտություն հայտնել Ռուսաստանի սկզբունքային դիրքորոշման համար (այդ թվում՝ միջազգային հարթակներում), որն ուղղված է իրավիճակի լիցքաթափմանը։

Մասուդ Փեզեշքիանը նաև շնորհակալություն է հայտնել Ռուսաստանին՝ իրանցի ժողովրդին մարդասիրական օգնություն ցուցաբերելու համար։

Պուտինն ընդգծել է հակամարտության քաղաքական-դիվանագիտական կարգավորման որոնումներին այսուհետ ևս աջակցելու, Մերձավոր Արևելքում արդար և տևական խաղաղություն հաստատելու նպատակով միջնորդական ջանքեր գործադրելու պատրաստակամությունը։ Այդ նպատակով Ռուսաստանը կշարունակի ակտիվ շփումները տարածաշրջանի բոլոր գործընկերների հետ։

Երկկողմ համագործակցության արդիական հարցերի քննարկման ընթացքում կողմերը հաստատել են ռուս-իրանական բարիդրացիական հարաբերությունների հետագա համապարփակ ամրապնդման փոխադարձ պատրաստակամությունը։

Մասուդ Փեզեշքիանը շնորհավորել է Պուտինին և Ռուսաստանի բոլոր ուղղափառ քրիստոնյաներին Զատկի տոնի առթիվ։