ՆախընտրելիՎեդիում, այսօր՝ մայիսի 7–ին, ի աջակցություն սեռական բռնության ենթարկված երկու անչափահաս քույրերի, բողոքի ակցիա իրականացրած քաղաքացիներին հրավիրել են Քննչական կոմիտե։
Նրանցից մեկը NEWS.am–ի հետ զրույցում նշեց. «Կանչել են, ասում են՝ պետք է ցուցմունք տալ, վկայություն տալ։ Ես էլ ցուցմունք չտվեցի, հրաժարվեցի։ Ասացի՝ իմ ցուցմունքը կարող է ուղղվի իմ ու իմ մերձավոր հարևանների դեմ։ Կանչել են բաժին, թե ինչի՞ եք խոսել։
Ես էլ ասացի՝ բոլորը խոսել են, ինչի եք մենակ ինձ ու Աննային կանչել։ Ընկել են ճահիճը փրփուրներից են կախվում։
Ես ասեցի՝ ես արդարության համար եմ խոսել, եթե մեղավոր եմ, ինձ տարեք պատժեք, բայց ես հրաժարվում եմ ցուցմունք տալուց։
Ինձ ասում է՝ եթե դուք հրաժարվում եք ցուցմունք տալուց, ձեզ վրա դատական գործ ենք հարուցում։ Ես ասացի՝ իմ տված ցուցմունքը կարող է ուղղեք իմ դեմ ու այդ երեխաների դեմ, որոնք իմ հարևանի երեխաներն են։ Ու դա ասում էր սպառնալով»։
Ավելի վաղ NEWS.am–ը հայտնել էր, որ Վեդի համայնքում բնակիչներն այսօր՝ մայիսի 7–ին, դուրս են եկել փողոց և իրենց վրդովմունք են հայտնել երկու անչափահաս քույրերի նկատմամբ սեռական բռնության դեպքի առիթով։ Նրանք բողոքում են, որ ենթադրյալ մեղավորներն ազատության մեջ են, իսկ աղջիկների հորեղբորը ձերբակալել են։
Նշենք, որ երեկ Վեդիում անչափահաս քույրերի հետ կապված գործով 2 անձ ձերբակալվել է և նրանց նկատմամբ կալանքի միջնորդություն է ներկայացվել։
Նշենք, որ ավելի վաղ դատախազությունից հայտնել էին, որ Վեդիում անչափահաս քույրերի նկատմամբ տեղի ունեցած առերևույթ դեպքի կապակցությամբ դատախազը հանրային քրեական հետապնդում է հարուցել Ա.Ե.-ի նկատմամբ՝ Քրեական օրենսգրքի 198-րդ հոդվածի 2-րդ մասի 2-րդ և 4-րդ կետերով (խոցելի վիճակում գտնվող անչափահասի նկատմամբ սեքսուալ բնույթի բռնի գործողություններ կատարելը) և Դ.Ա.-ի նկատմամբ՝ Քրեական օրենսգրքի 198-րդ հոդվածի 2-րդ մասի 2-րդ և 4-րդ կետերով (3 դրվագ)։
Հիշեցնենք, որ փաստաբան Վարդուհի Էլբակյանը երեկ հայտնել էր, որ գործում ներգրավված է 3 անձ, տուժողները 2 քույրեր են՝ 15 և 17 տարեկան։ Նա նաև հայտնել էր, որ աղջիկների հորեղբայրը տեսնելով, որ իրավապահներն անգործություն են ցուցաբերում, դանակահարել էր մանկապղծության մեջ մեղադրվողներից մեկին։ Վերջինս ձերբակալվել է։ Էլբակյանի խոսքով, աղջիկներից ավագը ենթարկվել բուժզննության և հաստատվել է այն, ինչ հայտնել է աղջիկը քննիչներին։
