նախընտրելի դարձնելՄենք հայտարարում ենք, որ ոչ միայն չենք պատրաստվում դուրս գալ Եվրասիական տնտեսական միությունից, այլև մտադիր ենք օգտագործել մեր լծակներն ու ներգրավվածությունը Հայաստանի տնտեսական շահերը պաշտպանելու համար։ Այս մասին մայիսի 28-ին Կառավարությունում կայացած ճեպազրույցի ժամանակ հայտարարել է ՀՀ վարչապետ Նիկոլ Փաշինյանը։
«Ինչ վերաբերում է արտահանմանն ու ներմուծմանը, ապա այս դեպքում ևս մենք գնում ենք դիվերսիֆիկացման ճանապարհով։ Եվ դա այսօր չի սկսվել։ Եթե հետևեք մեր վիճակագրությանը, կտեսնեք, որ տարբեր ուղղություններով մեր արտահանումն աճել է կրկնակի չափով»,- ասել է կառավարության ղեկավարը։
Նա նաև գոհունակություն է հայտնել այն կապակցությամբ, որ Ախալքալաք-Կարս երկաթգիծը բացվել է Հայաստանից արտահանման համար։ «Բացի այդ, առաջիկայում գործարար պատվիրակությունները կմեկնեն հանդիպումների՝ այս երկաթուղային գծի երկայնքով հնարավոր շուկաներն ուսումնասիրելու համար»,- հավելել է վարչապետը։
Փաշինյանի խոսքով՝ Հայաստանը հնարավորություն ունի դառնալ էներգետիկապես անկախ երկիր, քանի որ արևային պաշարները նրան անսահմանափակ հնարավորություններ են ընձեռում։
Նա նաև հավելել է, որ Հայաստանը կհամագործակցի ԱՄՆ-ի հետ՝ նոր երկրաբանական քարտեզի ստեղծման ուղղությամբ։ Միևնույն ժամանակ, ինչպես նշել է կառավարության ղեկավարը, Հայաստանը մինչև հնարավոր առավելագույն սահմանը կզարգացնի Եվրասիական տնտեսական միության շրջանակներում համագործակցությունը։
