ՆախընտրելիԻշխանությունները քայլեր կձեռնարկեն [արցախահայերի վերադարձի ուղղությամբ], բայց դա պետք է լինի հաջորդ իշխանությունը։ Այս իշխանություններից նման բան երբեք չի կարելի ակնկալել։ Այս մասին «Եռաբլուր» զինվորական պանթեոնում լրագրողների հետ զրույցում հայտարարել է «Ուժեղ Հայաստան» խմբակցության պատգամավոր Էդգար Ղազարյանը։
Նրա խոսքով՝ Հայաստանի ներկայիս իշխանություններն ուղիղ հայտարարել են, որ մտադիր չեն քայլեր ձեռնարկել արցախահայերի վերադարձի իրավունքի իրացման ուղղությամբ։ Ղազարյանը կարծում է, որ այս հարցը կարող է կրկին բարձրացվել իշխանափոխությունից հետո, երբ, իր իսկ ձևակերպմամբ, Հայաստանում ձևավորվի կառավարություն, որը շահագրգռված կլինի Արցախի հայ բնակչության շահերը պաշտպանելու ուղղությամբ։
«Այն, ինչ տեղի ունեցավ արցախահայության հետ, մարդու իրավունքների և միջազգային իրավունքի կոպտագույն խախտումների արդյունք է»,- ասել է պատգամավորը։
Ղազարյանը հայտարարել է, որ Արցախի հայ բնակչությունը հազարամյակներ շարունակ ապրել է իր հայրենի հողում, իսկ հետո հայտնվել է շրջափակման մեջ, որը, նրա խոսքով, տևել է մոտ մեկ տարի։ Նա հիշեցրել է, որ դրան հաջորդել է Ադրբեջանի ռազմական գործողությունը, որը հանգեցրել է մարդկային զոհերի և հայ բնակչության հարկադիր տեղահանմանը։
Խոսելով շրջափակման ժամանակաշրջանի իրադարձությունների մասին՝ Ղազարյանը հիշեցրել է արևմտյան քաղաքական գործիչների, այդ թվում՝ ԱՄՆ-ի նախկին պետքարտուղար Էնթոնի Բլինքենի հայտարարությունները։ Նրա խոսքով՝ Բլինքենը 2022 թվականի դեկտեմբերին հայտարարել էր Արցախը Հայաստանին կապող ճանապարհով երթևեկությունն ապահովելու անհրաժեշտության մասին։
«Հետո ի՞նչ, շրջափակումը վերացվե՞ց։ Եթե չվերացվեց, ապա ի՞նչ եղավ դրանից հետո»,- ասել է Ղազարյանը։
Նա նաև խոսել է Ստեփանակերտում վառելիքի պահեստի պայթյունի հետևանքով զոհվածների և այն մարդկանց մասին, ովքեր մահացել են Արցախից Հայաստան տանող ճանապարհին։ Պատգամավորի խոսքով՝ հասարակությունը մինչ օրս լիարժեք պատասխան չի ստացել զոհվածների թվի և նրանց մահվան հանգամանքների մասին հարցերին։
«Մենք ապրում էինք դժոխքում, պարզապես մեզ համար դա այնքան սովորական է դարձել, որ անգամ վառելիքի պահեստի պայթյունը ևս ընկալվում է որպես մի սովորական բան»,- հայտարարել է Ղազարյանը։
Նա առանձին հիշատակել է վարչապետ Նիկոլ Փաշինյանի տիկնոջը՝ Աննա Հակոբյանին։ Որպես շրջափակման ընթացքում կատարվածի նկատմամբ իշխանությունների վերաբերմունքի օրինակ՝ Ղազարյանը հիշել է նրա հրապարակած տեսանյութը, որտեղ նա բուխարու մոտ ֆուտբոլային հանդիպում էր դիտում։
«Հիշո՞ւմ եք, Արցախի շրջափակման օրերին, երբ ադրբեջանցիները փակեցին Շուշիի մոտակայքի ճանապարհը, բոլորս անհանգստանում էինք՝ ի՞նչ է լինելու հետո, ինչպե՞ս է այնտեղ մնալու արցախահայությունը։ Իսկ տիկին Աննան կառավարական առանձնատանը նստած էր բուխարու մոտ, մոմեր էր վառել ու ֆուտբոլ էր նայում»,- ասել է նա։
Ղազարյանի կարծիքով՝ նման դրվագները վկայում են այն մասին, որ իշխանության ներկայացուցիչները արցախահայերի հետ կատարվողը որպես սեփական ողբերգություն չէին ընկալում։
Մեկնաբանելով Փաշինյանի հայտարարությունն այն մասին, որ Ադրբեջանի նախագահ Իլհամ Ալիևը նույնպես արժանի է հայ վարչապետի ստացած խաղաղության մրցանակին՝ Ղազարյանն այդ խոսքերն անվանել է «ցինիզմ»։
«Դա ցինիզմ է»,- հայտարարել է պատգամավորը։
Նա նաև քննադատել է Փաշինյանի խոսքերն այն մասին, որ մեկ պետության մեջ չի կարող գոյություն ունենալ երկու պետություն, և հանդես է եկել ի պաշտպանություն Արցախի պետական ինստիտուտների գործունեության շարունակման։
Ղազարյանը, որպես օրինակ, բերել է լեհական վտարանդի կառավարությունը, որը Երկրորդ համաշխարհային պատերազմի ժամանակ, Լեհաստանի օկուպացիայից հետո, շարունակում էր աշխատանք իրականացնել երկրի սահմաններից դուրս։
«Ինչո՞ւ չպետք է գործեն Արցախի ինստիտուտները, պետական իշխանության մարմինները։ Ինչո՞ւ նրանք չպետք է գործեն իրենց հայրենիքում»,- հարցրել է նա։
Պատգամավորի խոսքով՝ Արցախի պետական ինստիտուտների պահպանումն անհրաժեշտ է նաև ապագա խաղաղ կարգավորման համար։ Նա կարծում է, որ դրանցից հրաժարվելը նշանակում է ոչ թե խաղաղություն, այլ վերջնական կապիտուլյացիա։
Ղազարյանը նաև հեգնանքով է մեկնաբանել Ալիևի մասին Փաշինյանի խոսքերը՝ համեմատելով դրանք այն իրավիճակի հետ, երբ պարգև ստացած մարդն ուզում է, որ այն ստանա նաև իր մտերիմ անձը։
«Կա հարազատության այնպիսի զգացում. երբ մարդ լավ բան է ստանում, ասում է՝ «Թող եղբայրս էլ ստանա»։ Իբր, մենք միասին ենք դա արել, միասին էլ կօգտվենք»,- ասել է պատգամավորը։
Ընդ որում, Ղազարյանը հայտարարել է, որ իշխանությունների ներկայիս քաղաքականությունը փաստացի ամրագրում է Արցախի կորստի հետևանքները։
